فوتو: ماڭعىستاۋ وبلىسى اكىمدىگى
ورتالىق ازياداعى العاشقى تەڭىز اكۆاشارۋاشىلىق جوباسى وبلىس اكىمدىگىنىڭ باستاماسىمەن, «Organic Fish» جشس قولداۋىمەن جۇزەگە اسىرىلعان. بۇل شارا قازاقستان تەڭىز اكۆاشارۋاشىلىعىن دامىتۋدىڭ ءىس جۇزىندە جۇزەگە اسىرىلا باستاعانىن كورسەتەدى.
شاراعا ماڭعىستاۋ وبلىسىنىڭ اكىمى نۇرداۋلەت قيلىباي, قر اۋىل شارۋاشىلىعى مينيسترلىگى بالىق شارۋاشىلىعى كوميتەتىنىڭ توراعاسى سەرىك سەرماعامبەتوۆ, «Organic Fish» جشس باس ديرەكتورى ەرجان امانقوس ۇلى, سونداي-اق قۇرىلتايشىلار اننا ماديقىزى, نۇرجان جاقىپ ۇلى جانە نۇرداۋلەت شىلدەباي ۇلى مەن سالا ارداگەرلەرى قاتىستى.
ءۇش ۇلكەن تور قورشاما مەن ارنايى ياكور جۇيەسىنەن تۇراتىن جابدىق نورۆەگيادا جاسالىپ, كاسپي تەڭىزىنىڭ تابيعي جاعدايىنا بەيىمدەلگەن. قۇرىق پورتىنا جەتكىزىلگەن تور قورشامالار شەتەلدىك جانە وتاندىق مامانداردىڭ كۇشىمەن قۇراستىرىلىپ, پورتتان 20 شاقىرىم وڭتۇستىكتەگى تەڭىز اۋماعىنا ورناتىلدى. ەكولوگيالىق جاعىنان تەڭىزگە ەش زيانى جوق.
كەلەسى كەزەڭدە تور قورشامالاردى بالىقپەن تولتىرۋ جوسپارلانعان. بۇل – قازاقستان مەن كاسپي تەڭىزى تاريحىنداعى ەڭ ۇلكەن تور قورشامالار: ارقايسىسىنىڭ اينالىمى 120 مەتر, تەرەڭدىگى 25 مەتر. العاشقى ەكى جىلدا ءوندىرىس كولەمىن 300-دەن 1600 تونناعا دەيىن جەتكىزىپ, كەيىن جىلىنا 5000 تونناعا دەيىن ۇلعايتۋ كوزدەلگەن. سونىمەن قاتار 80-نەن استام جاڭا جۇمىس ورنى اشىلادى.
جوبا تابيعي تازا ورتادا كاسپي البىرتى تۇقىمداس بالىق وسىرۋگە باعىتتالعان. بالىقتار ەكولوگيالىق تازا جەممەن قورەكتەنىپ, تەڭىزدىڭ تابيعي جاعدايىندا وسىرىلمەك. بۇل ولاردىڭ پايدالى قاسيەتتەرىن تولىق ساقتاۋعا مۇمكىندىك بەرەدى.
تەڭىز اكۆاشارۋاشىلىعى جوباسى نورۆەگيا اكۆاكۋلتۋرا ينستيتۋتىنىڭ كوپجىلدىق عىلىمي زەرتتەۋلەرىنە نەگىزدەلىپ ازىرلەندى.
زەرتتەۋلەر بارىسىندا تەڭىز سۋىنىڭ گيدرولوگيالىق, گيدروفيزيكالىق جانە گيدروحيميالىق سيپاتتامالارى, سونداي-اق ۋچاسكەنىڭ باتيمەترياسى جان-جاقتى زەرتتەلدى.
وبلىس اكىمى نۇرداۋلەت قيلىباي بۇل باستاما ماڭعىستاۋدىڭ اگروونەركاسىپتىك الەۋەتىن جاڭا دەڭگەيگە كوتەرىپ, حالقىمىزدىڭ يگىلىگىنە قىزمەت ەتەتىنىن اتاپ ءوتتى.
«بۇگىن ءبىز ماڭعىستاۋ وبلىسى ءۇشىن عانا ەمەس, بۇكىل قازاقستان ءۇشىن تاريحي ءمانى بار ماڭىزدى وقيعانىڭ كۋاسى بولىپ وتىرمىز. ەلىمىزدە العاش رەت تەڭىز تور قورشامادا بالىق ءوسىرۋ شارۋاشىلىعى ىسكە قوسىلىپ, كاسپي تەڭىزىنە العاشقى تور قورشامالار تۇسىرىلۋدە. بۇل جوبا – مەملەكەت باسشىسىنىڭ اگروونەركاسىپ كەشەنىن ءارتاراپتاندىرۋ, اكۆاشارۋاشىلىعىن دامىتۋ جونىندەگى تاپسىرماسى اياسىندا ىسكە اسىرىلىپ وتىر. بۇل باستاما جاڭا جۇمىس ورىندارىن اشۋعا, جاستاردى زاماناۋي بالىق شارۋاشىلىعى سالاسىنا تارتۋعا مۇمكىندىك بەرەدى. بۇل – قازاقستان اكۆاشارۋاشىلىعىنىڭ جاڭا كەزەڭى باستالعانىنىڭ ايقىن بەلگىسى. بۇل جوبا قازاقستانداعى تەڭىز اكۆاشارۋاشىلىعىنىڭ دامۋىنا جول اشىپ قانا قويماي, ايماقتىق ەكونوميكالىق وسىمگە, ەكسپورتتىق الەۋەتتىڭ ارتۋىنا جانە ەكولوگيالىق تۇراقتىلىقتىڭ ساقتالۋىنا زور ۇلەس قوسادى», دەدى. نۇرداۋلەت قيلىباي.
