اۋىل شارۋاشىلىعى جانە جەر قاتىناستارى باسقارماسىنىڭ باسشىسى داۋرەن توقۋجينوۆتىڭ ايتۋىنشا, ىلعالدىڭ مولدىعى ارقاسىندا داقىلداردىڭ شىعىمى بىردەي بولىپ, جوعارى ءونىم الۋعا جاقسى جاعداي تۋدىرعان.
«بۇگىندە استىق الاڭدارىنىڭ 486 مىڭ گەكتارى جينالىپ, 800 مىڭ تونناداي استىق باستىرىلدى. ازىرگە گەكتار بەرەكەسى 14,5 تسەنتنەردەن اينالۋدا. ال بۇرشاق تۇقىمداستاردى (بۇرشاق پەن جاسىمىق) جيناۋ 70%-عا جەتتى. قازىردىڭ وزىندە 350 مىڭ تونناداي ءدان الىندى», دەيدى.
وسى جاسىمىق داقىلىنا الىس شەتەلدەردەن دە سۇرانىس بار ەكەن. قازىردىڭ وزىندە م.جۇماباەۆ اۋدانىنداعى «سك اگرو» جشس ەگىس القاپتارىنان جاسىمىقتى تۇركيادان كەلگەن فۋرالار تيەپ كەتىپ جاتقان كورىنەدى. جاسىمىق وسىرگەن باسقا شارۋاشىلىقتاردىڭ دا بيىلعى شىعىمى جوعارى. مىسالى, «شاتيلو ي ك» شارۋاشىلىعى گەكتارىنا 18 تسەنتنەردەن السا «كانتەمير اگرو» مەن «رۋستيكۋس» جشس 20 تسەنتنەردەن ءونىم الىپ جاتىر. بۇگىنگە دەيىن بۇرشاقتەكتەس تۇقىم ونىمدەرىنىڭ الىس شەتەلدەرگە ەكسپورتتالۋى 90 مىڭ تونناعا جەتكەن. سونىڭ ىشىندە بۇرشاعى – 35 مىڭ, جاسىمىعى – 55 مىڭ توننا. داۋرەن توقۋجينوۆتىڭ ايتۋىنا قاراعاندا, جاسىمىقتى 1 گەكتارعا ەگۋ شىعىنى استىقتىڭ 1 گەكتارعا وسىرىلەتىن شىعىنىمەن بىردەي. الايدا جاسىمىقتىڭ نارىقتاعى باعاسى بيدايدان 2 ەسە ارتىق. سوندىقتان ديقاندار ونىڭ تابىستىلىعىنا قىزىعادى.
ۇكىمەت تاراپىنان جاسالعان جەڭىلدەتىلگەن نەسيەنىڭ ارقاسىندا كوكتەمگى ەگىسكە دەيىن استىق القاپتارىنا بارلىعى 340 مىڭ توننا مينەرالدى تىڭايتقىش جەتكىزىلدى. اۋىل شارۋاشىلىعى مينيسترلىگى وراق ناۋقانىنا قاجەتتى 58,2 مىڭ توننا ديزەلدى وتىندى جەڭىلدەتىلگەن 254 تەڭگەمەن بوساتتى. وسى جىلى شارۋالار 38,3 ملرد تەڭگەگە 1 395 دانا جاڭا تەحنيكا ساتىپ الدى. بيىلعى وراق ناۋقانىنا وبلىس بويىنشا بارلىعى 7 مىڭ كومباين شىقسا, سونىڭ 4 مىڭى – جوعارى ساپالى.
سولتۇستىك قازاقستان وبلىسى
