كورمەگە جاڭاارقا مەن ۇلىتاۋ اۋدانىنان, سونداي-اق جەزقازعان, ساتباەۆ, قاراجال قالالارىنان اۋىل شارۋاشىلىعى تاۋارىن وندىرۋشىلەر قاتىستى. ولار ەت پەن ءسۇت ونىمدەرىن, ءارتۇرلى ءۇي جاعدايىندا دايىندالعان شۇجىق تۇرلەرىن, قىمىز, قۇرت, ىرىمشىك, تابيعي ءجۇن مەن كيىزدەن جاسالعان بىرەگەي بۇيىمداردى, بىلعارىدان جاسالعان قولونەر تۋىندىلارىن, قوي جۇنىنەن جاسالعان سۋرەتتەر مەن كونە تاسىلمەن دايىندالعان قامشىلاردى تانىستىردى.
ء«بىر اۋىل – ءبىر ءونىم» جوباسى بەلگىلى ءبىر ايماقتىڭ بىرەگەي ءونىمىن تاۋىپ, ونى ناعىز جەرگىلىكتى برەندكە اينالدىرۋدا وبلىس تاراپىنان قولداۋعا يە بولىپ كەلەدى. كاسىپكەرلەر – ايماقتىڭ ماقتانىشىنا اينالعان ەرەكشە ءونىمنىڭ يەسى. ءار تاۋار تەك ساپاسىمەن ەمەس, تاريحىمەن, داستۇرىمەن, جۇرەك جىلۋىمەن قۇندى», دەدى ۇلىتاۋ وبلىسى اكىمىنىڭ ورىنباسارى جانىبەك ءنوپىروۆ.
برەند-كوميتەت مۇشەلەرى ونىمدەردى باعالاۋدا ولاردىڭ تابيعي قۇرامىن, قاپتامانىڭ گەرمەتيكالىعىن, برەندتەلۋ دەڭگەيى مەن بەزەندىرىلۋىنىڭ تارتىمدىلىعىن, سونداي-اق سانيتارلىق تالاپتارعا سايكەستىگىن ەسكەردى.
«اۋىل شارۋاشىلىعى ونىمدەرىنىڭ باستى ارتىقشىلىعى – تابيعي قۇرامىندا بوياعىشتار مەن كونسەرۆانتتاردىڭ بولماۋى. سول سەبەپتى, حالىقتىڭ دەنساۋلىعىنا پايداسى زور», دەيدى وبلىستىق كاسىپكەرلەر پالاتاسىنىڭ ديرەكتورى گۇلميرا قاجەنوۆا.
جوبادا ەت وڭدەۋ باعىتىندا جۇمىس ىستەيتىن «داركەنوۆا» جك (ساتباەۆ قالاسى) يەسى مادينا داركەنوۆا, قىمىز جانە قىمىزدان جاسالعان بالمۇزداق ءوندىرىسىن ورىستەتىپ وتىرعان «جاڭاارقا قىمىزى» جك (جاڭاارقا اۋدانى) يەسى ايتباي قاسىموۆ جانە بىلعارى وڭدەپ, قامشى جاسايتىن «قالدىباەۆ ە» جك (جاڭاارقا اۋدانى) يەسى ەرتاي قالدىباەۆ جەڭىمپاز اتاندى. ەندى ولار رەسپۋبليكالىق بايقاۋدا وبلىس نامىسىن قورعايدى. سونىمەن قاتار 5 ملن تەڭگە كولەمىندەگى گرانتقا ۇمىتكەر اتانادى. وزگە قاتىسۋشىلار العىس حاتتارمەن ماراپاتتالدى.
ۇلىتاۋ وبلىسى
