جاتاقحانانىڭ اشىلۋ سالتاناتىنا الماتى قالاسى اكىمىنىڭ ورىنباسارى ازامات قالدىبەكوۆ, ۋنيۆەرسيتەت رەكتورى مەن وقىتۋشى-پروفەسسورلار قۇرامى, سونداي-اق «دوس-مۇقاسان» ءانسامبلىنىڭ اڭىزعا اينالعان وكىلدەرى – دوسىم سۇلەەۆ, مۇرات قۇسايىنوۆ, ۇلىقپان سىدىقوۆ جانە مەيىربەك مولدابەكوۆ قاتىستى.
بۇگىن ق.ساتباەۆ اتىنداعى قازاق ۇلتتىق زەرتتەۋ تەحنيكالىق ۋنيۆەرسيتەتى ءۇشىن تاريحي كۇن. جاتاقحانا وقۋ ورنىنىڭ قاراماعىنا قايتارىلىپ, پايدالانۋعا تاپسىرىلدى. بۇل – قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ جاريالاعان «زاڭ جانە ءتارتىپ» قاعيداتىنىڭ ناقتى ورىندالۋىنىڭ ايعاعى. ۋنيۆەرسيتەت باسشىلىعىن, ۇستازدار مەن ستۋدەنتتەردى وسى قۋانىشتى وقيعامەن شىن جۇرەكتەن قۇتتىقتايمىن, – دەدى الماتى قالاسى اكىمىنىڭ ورىنباسارى ازامات قالدىبەكوۆ.
ايتا كەتسەك, بىرنەشە اي بۇرىن جاتاقحانا سوت شەشىمىمەن ۋنيۆەرسيتەتكە قايتارىلعان بولاتىن. سوت جەكەشەلەندىرۋ بويىنشا جاسالعان كەلىسىمدەردى زاڭسىز دەپ تانىپ, عيماراتتى ۋنيۆەرسيتەت قاراماعىنا بەرۋ تۋرالى قاۋلى شىعاردى. وسىلايشا, «دوس-مۇقاسان» اتىمەن بايلانىستى تاريحي عيمارات ستۋدەنتتەرگە قايتا بۇيىردى.
قازىرگى تاڭدا الماتىدا 120-دان استام ستۋدەنتتەر ءۇيى پايدالانۋعا بەرىلگەن. سونىمەن قاتار ءاربىر جوعارى وقۋ ورنىندا ستۋدەنتتەردىڭ تۇرمىستىق ماسەلەلەرىن شەشۋگە ارنالعان احۋالدىق ورتالىقتار جۇمىس ىستەيدى.
