مۇنداي سىرقاتتار تەك ادامنىڭ وزىنە عانا ەمەس, بۇكىل قوعامعا, ءتىپتى ەكونوميكالارعا اۋىر سالماق تۇسىرەدى. ۇيىم مالىمەتىندە:
«مۇنداي سىرقاتتار جەكە ادامدار مەن وتباسىلاردىڭ مەديتسينالىق شىعىندارىن كوبەيتەدى جانە الەمدىك ەكونوميكاعا ۇلكەن زالال كەلتىرەدى», دەلىنگەن.
ددسۇ-نىڭ «قازىرگى الەمدەگى پسيحيكالىق دەنساۋلىق» بايانداماسىندا بۇل بۇزىلىستاردىڭ تارالۋى جاسقا دا, تابىس دەڭگەيىنە دە بايلانىستى ەمەس ەكەنى ايتىلعان. ولار بارلىق ەلدە, بارلىق الەۋمەتتىك توپتاردا كەزدەسەدى. سونىمەن قاتار زەرتتەۋلەردە مۇنداي جاعدايلار ايەلدەردە جيىرەك بايقالاتىنى انىقتالعان.
ەكونوميكالىق شىعىن دا از ەمەس. مىسالى, تەك دەپرەسسيا مەن ۇرەيلى جاعدايلاردىڭ وزىنەن الەمدىك ەكونوميكا جىل سايىن 1 تريلليون دوللار جوعالتادى. ونىڭ ىشىندە ەمدەلۋگە جۇمسالاتىن تىكەلەي شىعىندار دا بار, الايدا نەگىزگى شىعىن ەڭبەك ونىمدىلىگىنىڭ تومەندەۋىنەن تۋىندايدى.
ۇيىمنىڭ پىكىرىنشە, ماسەلەنى شەشۋ ءۇشىن مەملەكەتتەر پسيحياتريالىق قىزمەتتەردى ءادىل قارجىلاندىرۋى كەرەك, ادام قۇقىقتارىن قورعاۋعا باعىتتالعان زاڭداردى جەتىلدىرۋى ءتيىس, پسيحياتر-دارىگەرلەر مەن ماماندار دايارلاۋعا تۇراقتى ينۆەستيتسيا سالۋى قاجەت.
ددسۇ ۇكىمەتتەر مەن حالىقارالىق ۇيىمداردى بۇل باعىتتا شۇعىل رەفورما جاساۋعا شاقىرىپ وتىر. سەبەبى پسيحيكالىق دەنساۋلىق ماسەلەلەرى تەك جەكە ادامداردىڭ عانا ەمەس, تۇتاس قوعامنىڭ دامۋىنا دا تىكەلەي اسەر ەتەدى.
