وبلىستىق پوليتسيا دەپارتامەنتى تاراتقان دەرەككە جۇگىنسەك, وڭىردە كوشى-قون سالاسىنداعى جۇمىس تىڭعىلىقتى زەردەلەنىپ جاتىر. قۇزىرلى ورگان قىزمەتكەرلەرى ءبىر تۇرعىن ۇيگە ونداعان, ءتىپتى جۇزدەگەن ادام رەسمي تۇردە تىركەلگەن مەكەن جايلاردى تەكسەرگەن.
ءىس-شارا بارىسىندا قازاقستان رەسپۋبليكاسىنىڭ 653 ازاماتى جانە تمد ەلدەرىنىڭ 26 ازاماتى اكىمشىلىك جاۋاپكەرشىلىككە تارتىلدى. پوليتسەيلەر جالعان تىركەۋ بەلگىلەرى بار 839 مەكەن جايدى انىقتادى. اتالعان پاتەرلەر مەن تۇرعىن ۇيلەردە جالپى سانى 16 306 ادام تىركەۋدە تۇرعان. ولاردىڭ ءبىر بولىگى بۇل مەكەن جايلاردا ەشقاشان تۇرماعان.
ازاماتتاردى ناقتى تۇرعىلىقتى جەرىنسىز تىركەگەنى ءۇشىن 82 ادام جاۋاپكەرشىلىككە تارتىلدى. سونىمەن قاتار, ون كۇننەن ءبىر ايعا دەيىن تىركەۋسىز نەمەسە جەكە باسىن كۋالاندىراتىن قۇجاتسىز تۇرعان 414 دەرەك انىقتالدى. بۇدان بولەك, 143 ادام جەكە باسىن كۋالاندىراتىن قۇجاتسىز, جارامسىز قۇجاتپەن نەمەسە ۋاقىتشا تۇرۋ ورنى بويىنشا ءبىر ايدان استام تىركەۋسىز ءومىر سۇرگەن.
تۇرعىن ءۇي يەلەرىنىڭ دە جاۋاپكەرشىلىگى نازاردان تىس قالعان جوق. ۇيىندە ءىس جۇزىندە تۇرمايتىن ادامداردى تىركەۋگە جول بەرگەنى ءۇشىن 47 ادام جاۋاپكەرشىلىككە تارتىلدى. تاعى 35 جاعدايدا پاتەر يەلەرى بۇرىننان تۇرمايتىن ادامداردى تىركەۋدەن شىعارۋ بويىنشا شارا قابىلداماعان.
