ەسكە سالا كەتەيىك, بيىلعى كينوجوبالار بايقاۋى ناۋرىز ايىندا باستالعان. بايقاۋدىڭ العاشقى كەزەڭىنە ەلەكتروندى فورماتتا جالپى سانى 323 ءوتىنىم كەلىپ ءتۇستى. ۇسىنىلعان ماتەريالداردى تەكسەرۋ ناتيجەسىندە 277 جوبا ساراپتاما كەڭەسىنىڭ قاراۋىنا جولدانسا, ءبىرىنشى كەزەڭنىڭ قورىتىندىسى بويىنشا ستسەناريلەر مەن ستسەناريلىك جوسپارلار فورماتىندا ۇسىنىلعان 107 جوبا كەلەسى كەزەڭگە ءوتتى. ال تولىق قۇجاتتار توپتاماسىن قاراۋ ناتيجەسىندە 95 جوبا پيتچينگكە قاتىسۋ قۇقىعىنا يە بولدى.
«سوڭعى جىلدارى ۇلتتىق كينو سالاسىندا بىرقاتار وڭ وزگەرىستەر ورىن السا, بۇل – سالا ماماندارىمەن بىرلەسىپ اتقارىلعان جۇيەلى جۇمىستىڭ ناقتى ناتيجەسى. مەملەكەت قارجىسىنا تۇسىرىلەتىن تۋىندىلاردىڭ ساپاسى, مازمۇندىق تەرەڭدىگى مەن جانرلىق ارالۋاندىعى جىل سايىن ارتىپ كەلەدى. مۇنى مەملەكەتتىك قولداۋعا ۇسىنىلاتىن جوبالاردى ىرىكتەۋ كونكۋرسىنىڭ ەرەجەلەرىن جەتىلدىرۋ, تالاپتاردى كۇشەيتۋ, سونداي-اق اشىقتىق پەن ادىلدىك قاعيداتتارىن باستى نازاردا ۇستاۋ باعىتىنداعى جۇمىستىڭ جەمىسى دەپ بىلەمىن. بيىلعى بايقاۋ دا وسى ۇستانىمدارعا باسىمدىق بەرە وتىرىپ جالعاسىن تاۋىپ جاتىر. جاس كينوگەرلەردىڭ بەلسەندىلىگىن ەرەكشە اتاپ وتكىم كەلەدى. ولاردىڭ جوبالارى تىڭ يدەيالارىمەن, باتىل شىعارماشىلىق ىزدەنىستەرىمەن ەرەكشەلەنىپ, ۇلتتىق كينونىڭ دامۋىنا جاڭا سەرپىن بەرىپ وتىر», دەپ جازدى پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا Facebook-تەگى پاراقشاسىندا.
ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى قۇرمانبەك جۇماعالي اشىق ءارى ءادىل ىرىكتەۋدىڭ وتاندىق كينونى دامىتۋداعى ماڭىزىنا توقتالدى.
«پيتچينگ – بايقاۋدىڭ ەڭ ماڭىزدى كەزەڭدەرىنىڭ ءبىرى. اۆتورلار جوبالارىن ساراپتامالىق كەڭەسكە تانىستىرىپ قانا قويماي, تاقىرىپتىڭ وزەكتىلىگىن, شىعارماشىلىق توپتىڭ كاسىبي دەڭگەيى مەن بولاشاق ءفيلمنىڭ الەۋەتىن كورسەتە الادى. كينو ورتالىعى ءۇشىن ىرىكتەۋدىڭ بارلىق كەزەڭدەرىنىڭ اشىق ءارى ءادىل ءوتۋى – باستى قاعيداتتاردىڭ ءبىرى. بيىلعى جوبالار زاماناۋي وتاندىق كينونىڭ دامۋىنا ءوز ۇلەسىن قوسىپ, كورەرمەن جۇرەگىنەن ورىن الادى دەپ سەنەمىن», دەدى.
بيىل باسىم باعىتتار قاتارىنا وتباسى قۇندىلىقتارى مەن ۇرپاق ساباقتاستىعى, تاريح پەن مادەني مۇرا, قازىرگى زامانعى ەڭبەك ادامىنىڭ بەينەسى, بالالار كينوسى, ەكولوگيا, سپورت مەن سالاۋاتتى ءومىر سالتى, سونداي-اق بىرلىك, بەيبىتشىلىك پەن قوعامدىق كەلىسىم يدەيالارى ەنگىزىلدى.
اشىق قورعاۋدىڭ العاشقى كۇنىندە قاتىسۋشىلار ساراپتاما كەڭەسىنە كوركەم فيلمدەر ساناتىنداعى جوبالارىن تانىستىردى. ءۇش كۇن بويى اۆتورلار ءوز جۇمىستارىن ۇسىنىپ, ونىڭ قورىتىندىسى بويىنشا مەملەكەتتىك قارجىلاي قولداۋعا, ۇلتتىق فيلم مارتەبەسىنە ۇمىتكەر جوبالارعا قاتىستى ۇسىنىمدار قالىپتاستىرىلادى.
پيتچينگتىڭ وتكىزىلۋ بارىسى كينو ورتالىعىنىڭ رەسمي YouTube-ارناسىندا تىكەلەي ەفيردە كورسەتىلەدى.
ايتا كەتەيىك, كانن كينوفەستيۆالىندە جاساندى ينتەللەكت كومەگىمەن جاسالعان العاشقى وتاندىق كوركەم ءفيلمنىڭ جابىق كورسەتىلىمى ءوتتى.
الماتى وبلىسىندا الەمدىك دەڭگەيدەگى كينوپاۆيلون سالىنىپ جاتىر.
الماتى
