فوتو: baq.kz
كانيكۋلدان ورالعان ماجىلىسمەندەردىڭ العاشقى جالپى وتىرىسىندا «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا جانە اكىمشىلىك قۇقىق بۇزۋشىلىق تۋرالى كودەكسكە سايلاۋدى جەتىلدىرۋ ماسەلەلەرى جونىندەگى ىلەسپە تۇزەتۋلەر:
– 2026-2028 جىلدارعا ارنالعان رەسپۋبليكالىق بيۋدجەت تۋرالى;
– رەسپۋبليكالىق جانە وبلىستىق بيۋدجەتتەر, رەسپۋبليكالىق ماڭىزى بار قالالار, استانا بيۋدجەتتەرى اراسىنداعى 2026-2028 جىلدارعا ارنالعان جالپى سيپاتتاعى ترانسفەرتتەردىڭ كولەمى تۋرالى;
– تسيفرلىق كودەكس جوباسى مەن وعان ىلەسپە تۇزەتۋلەر;
– «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭعا ەنگىزىلەتىن تۇزەتۋلەر;
– قىرعىزستانمەن جانە ماروككومەن بىرقاتار حالىقارالىق شارتتى راتيفيكاتسيالاۋ تۋرالى زاڭ جوبالارىن جۇمىسقا العانى حابارلاندى.
ءماجىلىستىڭ جالپى وتىرىسىنان كەيىن دەپۋتاتتاردان VIII شاقىرىلىمى ءتورتىنشى سەسسياسىندا قانداي ماسەلەلەردىڭ شەشىمىن تابۋدى كوزدەپ كەلگەنىن سۇراپ, بىلدىك.
ەلنۇر بەيسەنوۆ, قر پارلامەنتى ءماجىلىسىنىڭ الەۋمەتتىك-مادەني دامۋ كوميتەتىنىڭ مۇشەسى:
«اۋىل ازاماتتارىن الاڭداتىپ وتىرعان – ينفلياتسيا ماسەلەسى. ونىڭ ءبىر ۇشى اۋىلدىقتاردىڭ تابىس كوزىنە بارىپ تىرەلەدى. ءبىز وسى تاقىرىپتى ۇكىمەتتىڭ الدىنا قويامىز. سونىمەن بىرگە ەلىمىزدە 800 مىڭعا جۋىق ازامات ساياجايلاردا تۇرىپ جاتىر. ولار كەڭەس كەزەڭىندەگىدەي ساياجايلاردى ەكىنشى ءۇي رەتىندە پايدالانبايدى. قارا دومالاقتاردىڭ نەگىزگى تۇراقتى ۇيىنە اينالعان. ساياجاي بولعاندىقتان قولدانىستاعى زاڭ اياسىندا وندا مەكتەپ نە جول سالىپ, سۋ جۇرگىزە المايمىز. وسى ماسەلەنى رەتتەۋ ماقساتىندا زاڭ جوباسىن دايىنداپ جاتىرمىز. ءتۋريزمدى دامىتۋ جايى دا قوزعالۋى ءتيىس. بيىل ءوزىم الاكول, بالقاشقا بارىپ, ەل وڭىرلەرىن ارالاپ, حالىقپەن كەزدەستىم. وتباسىمىزبەن تابيعاتقا شىقتىق. راسىندا دا ءالى دە پىسىقتايتىن تۇستار بار. ءبىز كوبىنە جەكە كاسىپكەرلەرگە مىندەتتەۋگە تىرىسامىز. بۇل تۇرعىدا ۇكىمەت تە ينفراقۇرىلىمدى دامىتۋ, شەكارالاردى بەكىتۋ سىندى جۇمىستارعا نازار اۋدارۋ كەرەك. وزگە دە وزەكتى ماسەلەلەردى فراكتسيا, ءماجىلىس اتىنان پرەزيدەنتكە ۇسىندىق. ولاردىڭ ءبىرشاماسى الداعى جولداۋ اياسىندا قولداۋ تابادى دەپ سەنەمىز», دەدى دەپۋتات.
ايتۋار قوشمامبەتوۆ, قر پارلامەنتى ءماجىلىسىنىڭ ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى:
«ماجىلىستەگى «Respublicا» پارتياسىنىڭ 6 مۇشەسى 20 ايماقتى ارالادى. مەنىڭ ءوزىم 5 ايماقتى قامتىدىم. ءبىزدىڭ پارتيا باسىم نازاردى كاسىپكەرلىك, الەۋمەتتىك كاسىپكەرلىك پەن ءبىلىم بەرۋ, دەنساۋلىق ساقتاۋ سالاسىنا سالادى. سونداي-اق تۋريزم, اۋىل شارۋاشىلىعى, كرەاتيۆتى يندۋستيريا سالالارىنىڭ دا كۇرمەۋلى تۇسىن شەشۋگە دەن قويامىز. بۇگىن وندىرۋشىلەردى تولعاندىرىپ وتىرعان ماسەلەلەردى دەپۋتاتتىق ساۋالىمدا كوتەردىم. جوسپار بويىنشا ماسەلەلەردى جىل بويى ورتاعا سالامىز», دەدى ول.
ماكسيم روجين, قر پارلامەنتى ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى:
«جىلدان جىلعا نەگىزگى ماسەلەلەر وزگەرمەيدى. ول ينفراقۇرىلىم, مەكتەپ, سۋ, جول ماسەلەسى. مەن وسى جولى الماتى وبلىسىندا بولدىم. سوندا كورگەن شەشىمىن كۇتەتىن جايلار ءماجىلىس قابىرعاسىندا كوتەرىلەدى», دەدى ماكسيم نيكولاەۆيچ.
بولاتبەك ناجمەتدين ۇلى, قر پارلامەنتى ءماجىلىسىنىڭ ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى:
«وڭىرلەردى ارالاپ, حالىقپەن دە كەزدەستىك. كوكەيىندەگى ماسەلەلەرگە قۇلاق تۇردىك. سونداي-اق, ءبىز 2023 جىلى ناۋرىز ايىنىڭ سوڭىنان باستاپ ءماجىلىس قابىرعاسىندامىز. سول كەزدەن باستاپ شەشىمىن ءالى دە كۇتىپ تۇرعان ساۋالداردى سوڭىنا دەيىن جەتكىزگىمىز كەلەدى. كۇزدىك سەسسيادا سالىق كودەكسى بويىنشا, اۋىل شارۋاشىلىعى مەن ءوندىرىس, قۇرىلىس سالاسى مەن ادىلەت مينيسترلىگىنە قاتىستى ماسەلەلەردى تارازىلاۋعا ءۇن قوسپاقپىن. سونىڭ ىشىندە زاڭگەر كونسۋلتانتتار مەن جەكە سوت ورىنداۋشىلار, پالاتالار بويىنشا كەي ەرەجەلەردى قاتاڭداتۋ, جاۋاپكەرشىلىگىن كۇشەيتۋدى ۇسىنامىن. قازىر بيۋدجەتتە دەفيتسيت ەكەنى بەلگىلى. سول قارجىنى ءتيىمدى پايدالانۋ بويىنشا ءبىراز جۇمىستى ەڭسەرۋدى جوسپارلاپ وتىرمىز», دەدى ماجىلىسمەن.
وتكەن ساياسي كەزەڭدە ءماجىلىس 106 زاڭ جوباسىن قاراپ, 37 زاڭدى قابىلداعان. ونىڭ ىشىندە 19 زاڭعا پرەزيدەنت قول قويعان بولاتىن. تومەنگى پالاتا دەپۋتاتتارى وسى جولى دا شەشىمىن كۇتەتىن ماسەلەلەر نازاردان تىس قالمايتىنىن اتاپ ءوتتى.
