فوتو: jibek joly ارناسى, سكرينشوت
«زاڭ قابىلداندى, بىراق ونىڭ ىسكە اسۋىنا قاجەتتى قاعيدالار ءالى كۇنگە دەيىن انىقتالماي وتىر. كاسىپكەرلەرگە تۇسىنىكتى ەرەجەلەرسىز جاڭا رەەسترگە كوشۋ مۇمكىن ەمەس», دەدى دەپۋتات.
دەپۋتاتتىڭ سوزىنشە, بيىلعى مامىردا مەملەكەت باسشىسى وتاندىق ءونىم وندىرۋشىلەرگە ارنالعان مەملەكەتتىك قولداۋ تەتىكتەرىن قايتا قاراۋدى كوزدەيتىن زاڭعا قول قويعان. بۇل زاڭ بويىنشا بۇرىنعى ست-KZ جانە يندۋستريالدىق سەرتيفيكاتتاردىڭ ورنىنا ءبىرتۇتاس رەەستر ەنگىزىلىپ, مەملەكەتتىك جانە كۆازيمەملەكەتتىك ساتىپ الۋدا ارتىقشىلىق بەرىلمەك. الايدا اتالعان رەەستردىڭ ەرەجەلەرى تولىق پىسىقتالماي, بەلگىسىز كۇيدە قالىپ وتىر.
ايتۋار قوشمامبەتوۆ رەەستردىڭ ازىرلەنۋى بيزنەس وكىلدەرىمەن تالقىلانعانىن, ەكى مىڭنان استام كاسىپكەردەن ۇسىنىس تۇسكەنىن, بىراق كەيىننەن قۇجاتتىڭ تاعدىرى ايقىن بولماي قالعانىن ايتتى. ونىڭ ايتۋىنشا, قاڭقاسى دايىن رەەستردى ەنگىزۋدىڭ تەحنيكالىق مۇمكىندىگى دە جوق.
«ۋاقىت از, جاڭا جۇيە 2026 جىلدىڭ قاڭتارىنان باستاپ كۇشىنە ەنۋى ءتيىس, بىراق دايىندىق جەتكىلىكسىز. مۇنداي جاعدايدا كاسىپورىندار رەەسترگە تىركەلە الماي, مەملەكەتتىك تاپسىرىستان تىس قالۋى مۇمكىن», دەدى ول.
سونىمەن بىرگە دەپۋتات تسيفرلىق ۆەريفيكاتسيا جۇيەسىنىڭ دە تولىق جۇمىس ىستەمەگەنىن العا تارتتى. ونىڭ سوزىنشە, جاساندى ينتەللەكت نەگىزىندە اۆتوماتتاندىرىلعان تەكسەرىس بولۋى كەرەك ەدى, بىراق كوكتەمدە كورسەتىلگەن ۇلگىدە بۇل ىسكە اسپاعان. ول بۇل ماسەلە شەشىلمەسە, مەملەكەتتىك ساتىپ الۋ جۇيەسى مەن ءوندىرىستىڭ توقتاۋ قاۋپى بار ەكەنىن ەسكەرتتى.
قوشمامبەتوۆتىڭ ايتۋىنشا, قوسىمشا تالاپتار دا بيزنەسكە سالماق ءتۇسىرۋى ىقتيمال. ماسەلەن, كاسىپورىندارعا بەينەباقىلاۋ ورناتۋ مىندەتى جۇكتەلگەنىمەن, ونىڭ شىعىنىن كىم كوتەرەتىنى بەلگىسىز. سونداي-اق شالعاي اۋىلدارداعى ينتەرنەت ماسەلەسى شەشىلمەي تۇر.
وسىعان بايلانىستى ول ۇكىمەتكە رەەستردىڭ ناقتى ەرەجەلەرىن قايتا تالقىلاۋدى, تەحنيكالىق وپەراتسيالاردىڭ تولىق ءتىزىمىن بەكىتۋدى, بەينەكامەرا ورناتۋ مەن ينتەرنەتكە قولجەتىمدىلىك جايىن ايقىنداۋدى ۇسىندى. سونداي-اق جاڭا جۇيەنى پيلوتتىق رەجيمدە سىناپ كورۋ قاجەت ەكەنىن ايتتى.
ايتۋار قوشمامبەتوۆ بۇل زاڭنىڭ قابىلدانۋى ءاربىر وندىرۋشىگە اسەر ەتەتىنىن ايتىپ, اسىعىستىققا جول بەرىلمەۋى كەرەكتىگىن ەسكەرتتى.
