مەكتەپتەگى بۋللينگ ءۇشىن اتا-اناعا ايىپپۇل سالىنادى

ەگەر بۋللينگ العاش رەت تىركەلسە, ايىپپۇل كولەمى 10 اەك نەمەسە 39 320 تەڭگە بولادى. قايتالاۋ جاعدايىندا سوما 30 اەك-كە (117 960 تەڭگە) دەيىن وسەدى.

مەكتەپتەر مەن كوللەدجدەردە «دوسبولLIKE» اتتى انتيبۋللينگ باعدارلاماسى ەنگىزىلەدى. ونىڭ اياسىندا وقۋشىلارعا اپتاسىنا ءبىر رەت قاقتىعىستاردى شەشۋ, ەموتسيانى باسقارۋ جانە الەۋمەتتىك داعدىلاردى دامىتۋ ساباقتارى وتەدى.

سونىمەن قاتار بارلىق مەكتەپتەردە, كوللەدجدەردە جانە بالاباقشالاردا «جەكە قاۋىپسىزدىك ساباقتارى» قايتا ەنگىزىلەدى. سىنىپ ساعاتىندا وتەتىن 10 مينۋتتىق ساباقتاردا بالالار ينتەرنەتتەگى قاۋىپسىزدىك, الاياقتاردان قورعانۋ مەن توتەنشە جاعدايداعى ارەكەتتەردى ۇيرەنەدى.

ايتا كەتەيىك, بۋللينگتىڭ بىرنەشە ءتۇرى بار: فيزيكالىق (ۇرۋ, يتەرۋ, زاتتارىن سىندىرۋ), ۆەربالدى (مازاقتاۋ, بالاعاتتاۋ), الەۋمەتتىك (وقشاۋلاۋ, وسەك تاراتۋ) جانە كيبەربۋللينگ (الەۋمەتتىك جەلىلەردە قورلاۋ).

ەگەر بالاڭىز بۋللينگكە ۇشىراسا, ونى مەكتەپ اكىمشىلىگىنە حابارلاۋ قاجەت. سونداي-اق, تاۋلىك بويى جۇمىس ىستەيتىن «بالا قورعاۋ» ونلاين-چاتى جانە 111 جەدەل جەلىسى ارقىلى كومەك الۋعا بولادى.

بۇل شارالار مەكتەپتەردە قاۋىپسىز ورتا قالىپتاستىرۋعا باعىتتالعان.