دەپۋتات مەكتەپتەر مەن بالاباقشالاردا سانيتارلىق-ەپيدەميولوگيالىق قىزمەت وكىلدەرى تەكسەرىسپەن كەلگەن كەزدەگى جاعدايعا قاتىستى پىكىر ءبىلدىردى. ونىڭ ايتۋىنشا, سوڭعى جىلدارى شىنايى باقىلاۋدىڭ ورنىنا كوبىنە فورمالدى عانا تەكسەرەتىن جۇيە قالىپتاسقان.
قازىر ءبىلىم بەرۋ ۇيىمدارىنداعى سانيتارلىق تەكسەرىستەر الدىن الا كەلىسىلىپ جۇرگىزىلەدى. دەپۋتاتتىڭ سوزىنشە, كەي كەزدەرى ديرەكتورلارعا تىكەلەي كىنالى بولماسا دا جانە جاعدايعا ىقپال ەتە الماسا دا, ايىپپۇل سالىنعان جاعدايلار بولعان. مىسالى, مەكتەپ ءۇش اۋىسىمدا وقىتۋعا ءماجبۇر بولسا نەمەسە سىنىپتاعى وقۋشى سانى بەلگىلەنگەن نورمادان اسىپ كەتسە, مەكتەپ باسشىسىنىڭ وعان ىقپال ەتە المايتىنى بەلگىلى.
«بالالاردىڭ قاۋىپسىزدىگى تەك اتا-انالاردىڭ عانا ەمەس, بۇكىل قوعامنىڭ جاۋاپكەرشىلىگى. سانيتارلىق-ەپيدەميولوگيالىق باقىلاۋ جاي عانا تەكسەرىس ەمەس. بۇل – ەلدىڭ بولاشاعىن قورعاۋدىڭ ماڭىزدى تەتىگى», دەپ جازدى ايماعامبەتوۆ.
ەسكە سالا كەتەيىك, بۇعان دەيىن ماڭعىستاۋ وبلىسىنداعى بالالاردىڭ جاپپاي ۋلانۋىنان كەيىن دەنساۋلىق ساقتاۋ مينيسترلىگى مەكتەپ وقۋشىلارىن تاماقتاندىرۋدى ۇيىمداستىرۋعا مەملەكەتتىك باقىلاۋدى كۇشەيتۋ تۋرالى حابارلادى.
دەپۋتات ايتىپ وتىرعان جاڭا ەرەجەلەر بالالار بولاتىن نىساندارعا ەرەكشە مارتەبە بەرۋگە, تەكسەرىستەر تۋرالى الدىن الا حابارلاۋدى الىپ تاستاۋ ارقىلى وبەكتيۆتى باعا بەرۋگە, سونداي-اق نىسانداردى سانيتارلىق-ەپيدەميولوگيالىق تالاپتارعا سايكەستەندىرۋ ماقساتىندا مونيتورينگتىك ساپارلاردى ەنگىزۋگە باعىتتالعان.
