وقۋ-اعارتۋ مينيسترلىگىنىڭ مالىمەتىنشە, 2023-2024 جىلدارى رەسپۋبليكادا 422 جاڭا مەكتەپ پايدالانۋعا بەرىلدى. بۇل نىسانداردا 510 مىڭعا جۋىق وقۋشى ورنىن قامتۋعا مۇمكىندىك جاسالدى. ال 2025 جىلدىڭ سوڭىنا دەيىن تاعى 217 مەكتەپ اشىلىپ, قوسىمشا 460 مىڭنان استام وقۋشى ورنى دايىندالادى. وسىلايشا ءۇش جىل ىشىندە 927 مىڭ ورىنعا تەڭ ءبىلىم ينفراقۇرىلىمى قۇرىلادى.
ءار ءوڭىر بويىنشا دا ناقتى جۇمىستار ءجۇرىپ جاتىر. الماتى وبلىسىندا 2025 جىلى 54,6 مىڭ وقۋشى ورنىن قامتيتىن 53 مەكتەپتىڭ قۇرىلىسى باستالدى.
استانا قالاسىندا 2025 جىلدىڭ سوڭىنا دەيىن 20 جاڭا مەكتەپ سالىنىپ, 90 مىڭ ورىندىق ينفراقۇرىلىم ىسكە قوسىلادى.
تۇركىستان وبلىسىندا حالىق سانىنىڭ قارقىندى وسۋىنە بايلانىستى ەڭ كوپ جاڭا مەكتەپ بوي كوتەرۋدە – بيىلدىڭ وزىندە 15 نىسان اشىلىپ, 18 مىڭنان استام وقۋشى ورنى بەرىلمەك.
ماڭعىستاۋ وبلىسىندا 6 مەكتەپتىڭ قۇرىلىسى ءجۇرىپ جاتىر. ولاردىڭ ىشىندە اقتاۋ قالاسىندا – 2, جاڭاوزەندە – 1, ال بەينەۋ مەن قاراقيا اۋداندارىندا 3 جاڭا ءبىلىم وشاعى سالىنىپ جاتىر. جالپى وبلىستا 5,4 مىڭنان استام وقۋشى ورنى اشىلادى.
شىعىس قازاقستان وبلىسىندا 4 مەكتەپ پايدالانۋعا بەرىلىپ, 3,2 مىڭ بالاعا جاڭا ورىن دايىندالدى.
بۇعان قوسا, ۇلتتىق جوبا تەك جاڭا نىساندار سالۋمەن شەكتەلمەيدى. ءۇش جىل ىشىندە رەسپۋبليكا بويىنشا 1300 مەكتەپ كۇردەلى جوندەۋدەن وتەدى. 2025 جىلى – 262, 2026 جىلى – 436, 2027 جىلى – 466 مەكتەپ جاڭعىرتۋدان وتپەك. بۇل قادام اۋىلدىق جەرلەردەگى ءبىلىم ساپاسىن كوتەرۋگە جانە مەكتەپتەردىڭ ماتەريالدىق-تەحنيكالىق بازاسىن نىعايتۋعا باعىتتالعان.
جوبانىڭ تاعى ءبىر باعىتى – ينكليۋزيۆتى ءبىلىمدى دامىتۋ جانە اۋىل مەكتەپتەرىن قولداۋ. 2025 جىلدان باستاپ «اۋىل مەكتەبى – ساپا الاڭى» رەسپۋبليكالىق جوباسى ىسكە قوسىلدى. ونىڭ اياسىندا 192 تىرەك جانە 759 شاعىن جيناقتى مەكتەپ قامتىلماق. ولاردا جاڭا ادىستەمەلەر ەنگىزىلىپ, مۇعالىمدەردىڭ كاسىبي بىلىكتىلىگىن ارتتىرۋعا ەرەكشە كوڭىل بولىنەدى.
مامانداردىڭ ايتۋىنشا, «جايلى مەكتەپ» جوباسى قازاقستاننىڭ ءبىلىم بەرۋ جۇيەسىندە ساپالى سەرپىلىس جاساۋعا مۇمكىندىك بەرەدى. بارلىق جاڭا مەكتەپتەر حالىقارالىق ستاندارتتارعا سايكەس سالىنىپ, پاندىك كابينەتتەرمەن, سپورت جانە اكت زالدارىمەن, زەرتحانالارمەن, روبوتوتەحنيكا سىنىپتارىمەن, كىتاپحانالارمەن جابدىقتالادى.
«بۇل – بالالارعا تەڭ مۇمكىندىك بەرىپ, ساپالى ءبىلىم الۋىنا جاعداي جاسايتىن ستراتەگيالىق قادام. ۇلتتىق جوبانىڭ ناتيجەسىندە قازاقستانداعى اپاتتى جانە ءۇش اۋىسىمدى مەكتەپتەردىڭ ماسەلەسى ءبىرجولا شەشىلەدى», – دەپ اتاپ ءوتتى وقۋ-اعارتۋ مينيسترلىگىنىڭ ءباسپاسوز قىزمەتى.
