سۋرەتتى تۇسىرگەن – اۆتور
شىرعا سايىسىنىڭ شارتى بىرەۋ: 800 مەترلىك جارىس جولىندا تۇلكىنىڭ تۋلاعىنا قايسىسى بۇرىن جەتتى, جەڭىس سونىكى. ۇيىمداستىرۋشىلار ەڭ اۋەلى تازىلاردى توپ-توپقا ءبولدى. ولاردىڭ ىشىندە جارىس جولىنا جاڭا شىققانى دا, جۇلدەدەن جۇلدە العانى دا بار ەدى. دەي تۇرعانمەن, كەي-كەيدە باقتىڭ شاباتىنى دا بار... تارتىستى جارىس باستالماس بۇرىن ءانۇران ويناپ, اق تىلەكتەر اقتارىلدى.
«وسكەمەندە تۇڭعىش رەت قالا اكىمىنىڭ قولداۋىمەن تازىلاردىڭ شىرعاعا ءتۇسۋ سايىسى ۇيىمداستىرىلدى. كوزدەگەنىمىز – اتا ءداستۇردى جاڭعىرتۋ. سونىمەن قاتار بەكزات ونەردى جالعاستىرسا ەكەن دەگەن نيەتتە جاستاردى قىزىقتىرعىمىز دا كەلدى. ءسويتىپ, جارىس ۇيىمداستىرۋدى ءجون دەپ شەشتىك», دەدى وسكەمەن قالالىق سپورت ءبولىمىنىڭ باسشىسى دياس ەرلان ۇلى.
جارىس الاڭىندا اقشاڭقاڭ كيىز ءۇي تىگىلىپ, قوڭىر دومبىرادان كۇي اۋەلەدى. رۋحتى اندەر شىرقالدى. سايىسقا قاتىسۋشىلار جاراپ تۇرعان تازىلارى تۋرالى اڭىزعا بەرگىسىز اڭگىمەلەرىن ايتىپ, ارقا-جارقا بولىستى. ءبىرىنىڭ تازىسى قابان السا, ەندى ءبىرى الدىنا قارا سالمايدى دەستى.
«لاشىن» اتتى تازىممەن ەكىنشى رەت جارىسقا قاتىستىق. اڭعا ءتۇسىپ كورمەگەنىمەن, كۇندەلىكتى جۇگىرەدى. تاماعىن دا ۋاقىتىمەن بەرىپ, جاراتىپ وتىرامىن», دەيدى يتبەگى نازىم تۇرسىنباەۆا.
ءسويتىپ, جارىس جولىنا 40 تازى توپ-توبىمەن, كەزەك-كەزەگىمەن شىقتى. ءا دەگەندە قۇمايدىڭ ءبىرى شىرعاعا ورنىنان اتىلسا, ەندى ءبىرى جايباسارلىق تانىتتى. جارتى جولدان كەرى قايتقان تازىلار دا بولدى.
ناتيجەسىندە, جۇلدەلى 1-ورىندى ەركەبۇلان ادىلبەكوۆتىڭ «سارى قىز» اتتى تازىسى ەنشىلەدى. 2-ورىن ءاليحان بايتەكوۆتىڭ «جەبە» دەيتىن تازىسىنا بۇيىردى. ال 3-ورىن بوتاجان جۇماحانوۆتىڭ جاراتقان جۇيرىگى الدى. وسكەمەندە العاش ۇيىمداستىرىلعان جارىستىڭ تارتىستى وتكەنىن بايقاعان ۇيىمداستىرۋشىلار ءداستۇرلى سايىسقا اينالدىرامىز دەگەندەي دە ۇسىنىس ايتتى.
شىعىس قازاقستان وبلىسى
