سۋرەت: gov.kz
«جاستار پراكتيكاسىمەن»جۇمىسقا ورنالاسقانداردىڭ كوشىن ەلىمىزدىڭ وڭتۇستىگىندەگى وڭىرلەر باستاپ تۇر. ناقتىلاساق, تۇركىستان وبلىسىندا – 2,1 مىڭ, جامبىلدا – 802 ادام, قىزىلوردا وبلىسىندا – 775, شىمكەنت قالاسىندا 665 ادام تىركەلگەن. ال اۋىل تۇرعىندارىنىڭ ۇلەسى – 5 مىڭ ادام, پايىزبەن ەسەپتەگەندە 58,1%-عا جەتكەن.
باعدارلاما شارتى تۋرالى از-كەم ايتا كەتسەك, مۇمكىندىكتى 35 جاسقا دەيىنگى ەل ازاماتتارى پايدالانا الادى. ول ءۇشىن ۇمىتكەردىڭ ماماندىعى بويىنشا ءبىلىمى بولۋعا ءتيىس. بۇل باعدارلاما وقۋىن ءبىتىرىپ, جۇمىس تاپپاي جۇرگەن تۇلەكتەردىڭ ءوز ماماندىعى بويىنشا تاجىريبە جيۋىنا تاپتىرماس مۇمكىندىك. سەبەبى ەڭبەك نارىعىندا جۇمىس بەرۋشىلەردىڭ تاڭداۋى كوبىنە جاس مامانعا ەمەس, ءوز سالاسىندا ىسىلعان, دايىن قىزمەتكەرگە تۇسەدى.
باعدارلاما ارقىلى جۇمىسقا ورنالاسقانداردىڭ اراسىندا ەڭ كوپ سۇرانىسقا يە ماماندىق – مەيىرگەر. وعان 654 ادام جۇمىسقا تارتىلعان. سوسىن زاڭگەر – 367, باستاۋىش سىنىپ مۇعالىمى – 309, تاربيەشى – 292, شەت ءتىلى مۇعالىمى – 282 ادام. «جاستار پراكتيكاسىنا» قاتىسقان وتانداستاردىڭ ىشىندە كوكشەتاۋ قالاسىنىڭ تۇرعىنى ءباتيما جاسۇلانوۆا بار.
«بىلتىر كەنجەعالي ساعاديەۆ اتىنداعى حالىقارالىق بيزنەس ۋنيۆەرسيتەتىن «ونەركاسىپتەگى حالىقارالىق بيزنەس-لوگيستيكاسى» ماماندىعى بويىنشا ءبىتىردىم. از ۋاقىت استاناداعى ءبىر ۇيىمدا جۇمىس ىستەپ, قىسقارتۋ كەزىندە جۇمىستان بوساپ قالدىم. «مانساپ» ورتالىعىنا حابارلاسىپ, جۇمىسسىز رەتىندە تىركەلدىم. وندا ماعان «جاستار پراكتيكاسىنا» قاتىسۋدى ۇسىندى. قازىر اقمولا وبلىسىنىڭ جولاۋشىلار كولىگى جانە اۆتوموبيل جولدارى باسقارماسىندا كولىك ينجەنەرى بولىپ جۇمىس ىستەيمىن», دەيدى ءباتيما جاسۇلانوۆا.
بۇگىندە باعدارلامانىڭ مۇمكىندىگىن پايدالانعانداردىڭ ورتاشا جالاقىسى رەسپۋبليكا بويىنشا 109,5 مىڭ تەڭگەنى قۇراپتى. «جاستار پراكتيكاسىن» ەڭبەك موبيلدىلىگى ورتالىعى «ازاماتتارعا ارنالعان ۇكىمەت» مەملەكەتتىك كورپوراتسياسى ارقىلى جۇمىسشىنىڭ اي سايىنعى جالاقىسىن تولەۋ ارقىلى قارجىلاندىرادى. مەملەكەت ۇسىنعان مۇمكىندىكتى پايدالانىپ, ەڭبەك نارىعىندا ءوز جولىن تاپقان جاستار كوپ.
