بۇگىن, 28 تامىز 2025 جىلى, الماتىداعى MOST IT HUB الاڭىندا الماتى قالاسى وڭىرلىك كاسىپكەرلەر پالاتاسىنىڭ وڭىرلىك كەڭەسىنىڭ جانە كرەاتيۆتى يندۋستريالار مەن IT جونىندەگى سالالىق كەڭەستىڭ كەڭەيتىلگەن وتىرىسى ۇيىمداستىرىلدى.
IT-سەكتوردى نىعايتۋ جانە تسيفرلىق ەكونوميكانى دامىتۋ بويىنشا بىرلەسكەن قادامداردى ايقىنداۋ ءۇشىن وتكەن باسقوسۋعا بيزنەس وكىلدەرى, تەحنولوگيالىق كومپانيالار, ينۆەستورلار مەن يندۋستريالىق سەرىكتەستەر قاتىستى. جيىندا قازاقستانداعى IT سالاسىن دامىتۋدىڭ وزەكتى ماسەلەلەرى – وندىرىستەگى تسيفرلاندىرۋ مەن B2B شەشىمدەردەن باستاپ, ۆەنچۋرلىك قارجىلاندىرۋدىڭ بولاشاعى مەن قارجى سەكتورىمەن ىقپالداستىققا دەيىنگى تاقىرىپتار تالقىلاندى.
كەڭەستە وتاندىق مەسسەندجەر Aitu-عا ارنايى نازار اۋدارىلدى. BTS Digital كومپانياسىنىڭ وكىلدەرى سەرۆيس مۇمكىندىكتەرىن تانىستىرىپ, ونىڭ قازاقستاننىڭ تسيفرلىق ەكوجۇيەسىنە ينتەگراتسيالاۋ تەتىكتەرىن كورسەتتى.
BTS Digital باس ديرەكتورىنىڭ مىندەتىن اتقارۋشى جاركىنبەك ازاماتوۆ:
«قازاقستاننىڭ بولاشاعى – تەحنولوگيالىق پروگرەستە, ال Aitu-دى دامىتۋ وسى جولداعى ماڭىزدى قادامداردىڭ ءبىرى. ءبىزدىڭ جۇمىسىمىزدىڭ ورتالىعىندا – پايدالانۋشى. Aitu-دىڭ كۇندەلىكتى ومىردە ىڭعايلى ءارى پايدالى بولۋى ماڭىزدى. ءبىز پلاتفورمانى ازاماتتار, بيزنەس جانە مەملەكەتتىك قۇرىلىمدار ءۇشىن قۇرال رەتىندە دامىتىپ كەلەمىز. بۇگىندە سۋپەراپپتە كومپانيالارعا ارنالعان شەشىمدەر بار – چات-بوتتار مەن كولل-ورتالىقتاردى ينتەگراتسيالاۋدان باستاپ, ميني-قوسىمشالارعا دەيىن. بۇل – جاڭا سەرىكتەستىككە جول اشاتىن مۇمكىندىك», – دەدى.
تسيفرلاندىرۋ تاجىريبەسىمەن او «قازاقستان حالىق بانكى» باسقارما توراعاسىنىڭ ءبىرىنشى ورىنباسارى داۋرەن سارتاەۆ ءبولىستى. ول Aitu مەسسەندجەرى تۋرالى دا پىكىر ءبىلدىردى:
«بۇگىن وتاندىق Aitu مەسسەندجەرىنىڭ دامۋى تۋرالى تىڭ اقپارات الۋ پايدالى بولدى. قازىردىڭ وزىندە ىسكە اسقان فۋنكتسيالار سەرۆيستىڭ ءارى قاراي دامۋىنا مىقتى باسەكەلىك نەگىز بولا الادى. اسىرەسە شەتەلدىك بالامالارمەن باسەكەلەستىك جاعدايىندا. بۇل – ەلدىڭ تسيفرلىق ەگەمەندىگىن نىعايتۋداعى ماڭىزدى قادام», – دەدى ول.
جيىن قورىتىندىسىن الماتى قالاسى وڭىرلىك كەڭەسىنىڭ توراعاسى نۇرسۇلتان شوكانوۆ جاسادى: «مەملەكەت باسشىسى ەلىمىزدە تسيفرلىق ەكوجۇيەنى دامىتۋعا جاعداي جاساپ وتىر, بۇل ەلدىڭ باسەكەگە قابىلەتتىلىگى ءۇشىن شەشۋشى فاكتور. ءبىزدىڭ مىندەت – بيزنەس تە, قوعام دا «تسيفرلىق تۇتىنۋشىلىق پاتريوتيزم» قالىپتاستىرىپ, وتاندىق ونىمدەر مەن سەرۆيستەردىڭ دامۋىنا قولداۋ كورسەتۋ, ولاردى جاھاندىق نارىققا شىعاراتىن باسەكەگە قابىلەتتى دەڭگەيگە جەتكىزۋ», – دەدى ول.
كەڭەستە سونداي-اق BYB Production ينۆەستيتسيالىق قورىنىڭ باسقارۋشى سەرىكتەسى ا.بەليسبەكوۆ, «Omir Group Ltd» ديرەكتورلار كەڭەسىنىڭ مۇشەسى د.كۋناەۆ ءسوز سويلەپ, وتاندىق IT نارىعىن دامىتۋدىڭ, قازاقستاندىق ونىمدەردى ىلگەرىلەتۋدىڭ, سونىڭ ىشىندە Aitu مەسسەندجەرىن قولداۋدىڭ ماڭىزىن اتاپ ءوتتى.
