اتالعان ءبىلىم وشاعى «كەلەشەك مەكتەپتەرى» ۇلتتىق جوباسى اياسىندا سالىنىپ, ەل يگىلىگىنە بەرىلگەن بولاتىن. اتالعان مەكتەپتى بىلىكتى ۇستاز گۇلميرا ەسەنتاەۆا باسقارىپ كەلەدى.
جۇمىس بارىسىمەن مەكتەپتىڭ پەداگوگ - ۇيىمداستىرۋشىسى ارۋجان كارىمقىزى تانىستىردى. اتا-انالار دا جۋرناليستەرمەن بىرگە عيماراتتى ارالاپ كوردى. مەكتەپتىڭ 360 ورىنعا ارنالعان اسحاناسى, 500 ورىندىق ءماجىلىس زالى تالاپقا ساي. كەڭ دە اسەم سپورت زالى ورنالاسقان. باستاۋىش سىنىپ بولمەلەرى دە ادەمى, جيناقى. ءار قاباتتا كوۆوركينگ. مەديتسينالىق بولمە, شىعارماشىلىق جۇمىس بولمەلەرى جۇمىس ىستەيدى. حيميا, بيولوگيا كابينەتتەرى دە سوڭعى ۇلگىدەگى قوندىرعىلارمەن جابدىقتالعان. كىتاپحانادا 13 مىڭ دانا كىتاپ قورى بولسا, ادەبي كوركەم تۋىندىلار 4020 دانانى قۇرايدى.
ەڭبەككە باۋلۋ بولمەسى ۇلدارعا بولەك, قىزدارعا بولەك قامتىلعان. قىزداردىڭ اس دايىنداۋىنا ارنالعان بولمە دە بار. كوركەم ەڭبەك ءپانىنىڭ مۇعالىمى ايزات ۇزاتوۆا قىزدارعا تىگىنشىلىكتى قالاي ۇيرەتەتىنىن بايانداپ بەرسە, بيولوگيا ءپانىنىڭ مۇعالىمى ەلميرا تولەپوۆا از ۋاقىتتا ءوزىنىڭ وقىتۋ تاسىلىنەن حاباردار ەتتى. ءار وقۋشىعا گيدروپونيكا, ميكروسكوبتار بەرىلگەنىن ايتىپ ءوتتى. قىتايلىق قوندىرعىنىڭ كومەگىمەن قيار, قىزاناق ءوسىرۋ جولدارىن دا وقۋشىلار ۇيرەنۋدە. ياعني, عىلىمي جولدىڭ نەگىزى مەكتەپتەن قالانىپ جاتىر.
«اشىلعانىمىزعا ءبىر جىل ەندى بولسا دا, اۋدان بويىنشا ۇزدىك 10 مەكتەپتىڭ قاتارىنا كىردىك. ۆولەيبولدان مەكتەپتىڭ وقۋشىلار قۇراماسى رەسپۋبليكالىق تۋرنيردە توپ جاردى. جاعاجاي ۆولەيبولىنان دا مەكتەپ شاكىرتتەرى جەڭىسكە جەتتى. فۋتبول الاڭى, ويىن الاڭدارى وقۋشىلاردى قۋانىشقا بولەيدى. مەكتەپتە شاحمات, فۋتبول ۇيىرمەلەرى جۇمىس ىستەيدى. «اباي وقۋلارى», «مۇقاعالي وقۋلارى» بايقاۋلارىندا دا اۋداندىق, وبلىستىق دەڭگەيدە جاقسى ناتيجەگە قول جەتكىزدىك. 16 وقۋشىمىز وبلىستىق ءپان وليمپيداسىنا قاتىسىپ, 4 وقۋشى جۇلدەلى ورىنعا ىلىكتى. مۇنىڭ ءبارى مەكتەپ مۇعالىمدەرى مەن قىزمەتكەرلەرىنىڭ جۇمىلا اتقارعان جۇمىسىنىڭ جەمىسى», دەيدى اتالعان مەكتەپ ديرەكتورىنىڭ تاربيە ءىسى جونىندەگى ورىنباسارى سايا قالاباەۆا.
جۋرناليستەرمەن بىرگە مەكتەپتى ارالاعان اتا-انانىڭ جاسى ۇلكەنى 81 جاستاعى ساليحا ەسقاراەۆا. 4 نەمەرەسى وسى مەكتەپتە ءبىلىم الادى ەكەن. ول كىسى قازىرگى مۇمكىنشىلىككە كوڭىلى تولىپ, جاستارعا اق باتاسىن بەردى.
«مەنىڭ 1,2,4 وقيتىن بالالارىم وسى مەكتەپتە وقيدى. مۇندا بارلىق جاعداي جاسالعان. وقۋ زالدارى, ءماجىلىس زالى, كىتاپحانا كوڭىلدەن شىعادى. كەيدە بالالارىمىز ارقىلى جازدىرىپ, ءوزىمىز دە مەكتەپتەن ادەبي كوركەم كىتاپتار الىپ وقىپ ءجۇرمىز». دەيدى جاس اتا-انا شىنار اسقارقىزى.
اتالعان مەكتەپتىڭ بيىلعى وقۋ جىلىنا ازىرلەگەن جوسپارلارى دا قوماقتى. مەكتەپ 600 وقۋشىعا ارنالعان. وقۋشىلار مەملەكەتتىڭ قامقورلىعىن سەزىنىپ وسىنداي مەكتەپتە ءبىلىم العاندارىنا ءدان ريزا.
ايتا كەتۋ كەرەك, وڭىردە جوبا اياسىندا بۇگىنگى كۇنگە دەيىن 4 مەكتەپ پايدالانۋعا بەرىلگەن, 3 مەكتەپ جىل سوڭىنا دەيىن اشىلادى.
