ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتى بيىلعى قابىلداۋ ناۋقانىنا 590-نان اسا ۇمىتكەر قاتىسسا, ولاردىڭ 350-دەن استامى وقۋ ورنىنىڭ ستۋدەنتى اتانعان.
ايتا كەتەيىك, كونكۋرستىق ىرىكتەۋ 7 ماماندىق پەن 16 بىلىكتىلىك بويىنشا ءوتتى. ەڭ كوپ تاڭدالعان باعىتتار قاتارىندا «بارلاۋ بولىمشەلەرىن باسقارۋ» جانە «موتواتقىشتار بولىمشەلەرىن باسقارۋ» بولدى.
قورعانىس مينيسترلىگىنىڭ حابارلاۋىنشا, راديوەلەكترونيكا جانە بايلانىس اسكەري-ينجەنەرلىك ينستيتۋتىنا 360 تالاپكەر قۇجات تاپسىردى, ولاردىڭ ىشىندە 200-دەن استامى وقۋعا قابىلدانعان. بيىلدان باستاپ مۇندا جاڭا باعىتتار – «اسكەري ىستەگى كريپتولوگيا» جانە شىعىس تىلدەرى بويىنشا «حالىقارالىق اسكەري قاتىناستار جانە اۋدارما ءىسى» ەنگىزىلدى. ساباقتار ەكى ديپلومدىق باعدارلاما بويىنشا قازاقستاندىق جوعارى وقۋ ورىندارىمەن بىرلەسىپ جۇرگىزىلەدى. كونكۋرس 7 ماماندىق پەن 12 بىلىكتىلىك نەگىزىندە ءوتتى. ەڭ تانىمال ماماندىق – «اقپاراتتى قورعاۋ تەحنولوگياسى جانە ۇيىمداستىرۋ» بولدى.
«تالعات بيگەلدينوۆ اتىنداعى اۋە قورعانىس كۇشتەرىنىڭ اسكەري ينستيتۋتىنا 600-ءدىڭ ۇستىندە ءوتىنىش كەلىپ ءتۇستى, الايدا ونىڭ تەك 260-تان استامى عانا كۋرسانت اتاندى. كونكۋرستىق ىرىكتەۋ 7 ماماندىق جانە 15 بىلىكتىلىك بويىنشا ءوتتى. اسكەري ءبىلىم ورداسىندا وقىعاندار ۇشقىشتار, ينجەنەر-تەحنيكتەر, تەڭىزشىلەر جانە اسكەري دارىگەرلەر ماماندىقتارىن الادى. مەديتسينالىق بەيىندەگى مامانداردى وقىتۋ مارات وسپانوۆ اتىنداعى باتىس قازاقستان مەديتسينالىق ۋنيۆەرسيتەتىنىڭ بازاسىندا جۇزەگە اسىرىلاتىن بولادى. ال تەڭىز كافەدراسىنىڭ كۋرسانتتارى اقتوبە اسكەري جوعارى وقۋ ورنىندا ەكى جىل وقىعاننان كەيىن شاحماردان ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىندە ماماندىقتى يگەرۋدى جالعاستىرادى. بۇل وقۋ ورنىندا «مەملەكەتتىك اۆياتسياداعى اۋە كەمەلەرىن ۇشۋعا پايدالانۋ» جانە «اسكەري مەديتسينا» ماماندىقتارى ەرەكشە تانىمال», دەلىنگەن حابارلامادا.
ال, «سارباز 2.0» باعدارلاماسى بويىنشا بيىل اسكەري ينستيتۋتتارعا مەرزىمدى قىزمەتىن وتەپ جۇرگەن جانە اسكەري بورىشىن اتقارىپ بولعان 128 ازامات قابىلدانعان.
سونىمەن قاتار ۇقشۇ شەڭبەرىندەگى ىنتىماقتاستىق اياسىندا قىرعىزستان مەن تاجىكستاننان كەلگەن تالاپكەرلەر دە الماتىداعى راديوەلەكترونيكا جانە بايلانىس اسكەري-ينجەنەرلىك ينستيتۋتىندا ءبىلىم الادى. ولار الدىمەن جاس جاۋىنگەر كۋرسىنان ءوتىپ, ءوز ەلدەرىندە انت قابىلداعان سوڭ قازاقستانعا ورالادى.
اسكەري وقۋ ورىندارىمەن قاتار كاسىبي سەرجانتتاردى دايارلاۋ باعدارلاماسى بويىنشا دا 900-دەن استام تالاپكەر قابىلداندى. ولار ەلىمىزدىڭ بەس اسكەري كوللەدجىندە ءبىلىم الادى:
- ساعادات نۇرماعامبەتوۆ اتىنداعى اسكەري كوللەدج (استانا);
- باۋىرجان مومىش ۇلى اتىنداعى اسكەري-سپورت كوللەدجى (الماتى);
- سابىر راحىموۆ اتىنداعى اسكەري كوللەدج (شىمكەنت);
- تالعات بيگەلدينوۆ اتىنداعى اسكەري كوللەدج (قاراعاندى);
- شوقان ءۋاليحانوۆ اتىنداعى اسكەري كوللەدج (اقمولا وبلىسى, ششۋچينسك).
بارلىق قابىلدانعان كۋرسانتتار ءبىر ايلىق جاس جاۋىنگەر كۋرسىنان وتەدى. وعان ساپتىق دايىندىق, اتىس ماشىعى, دەنە شىنىقتىرۋ, اسكەري جارعىلاردى مەڭگەرۋ جانە پراكتيكالىق جاتتىعۋلار كىرەدى. كۋرستىڭ سوڭىندا بولاشاق ساربازدار اسكەري انت قابىلداپ, كاسىبي اسكەري ءومىردىڭ جاڭا كەزەڭىن باستايدى.
