بۇل مارافون 13 شىلدەدە چەحيا استاناسى پراگادان باستالعان. قاتىسۋشىلار ءبىر جارىم اي ىشىندە اۋستريا, ماجارستان, تۇركيا, گرۋزيا, ازەربايجان جانە ورتالىق ازيانىڭ بىرنەشە ەلىن كەسىپ ءوتتى. ءسويتىپ, شىعىسقا جەتىپ, تابان تىرەگەن. ايتا كەتەرلىگى, مۇندا قاراپايىم شاعىن كولىكتەر جارىس جولىنا شىققان. قاتىسۋشىلار تەك ەسكى ءارى كولەمى شاعىن كولىكپەن جولعا شىعۋعا ءتيىس ەدى. باعىت بىرەۋ بولعانىمەن, جەتۋ جولىن اركىم ءوزى تاڭدادى.
– ءبىزدىڭ كولىك 1998 جىلعى. ءبىز ونى جولعا ابدەن دايىندادىق. سونىڭ وزىندە ءتۇرلى قيىندىق بولدى. قانشاما قالانى باسىپ وتتىك. بايقاعانىمىز, قازاقستان ەرەكشە اسەر قالدىردى. تابيعاتى اسەم, حالقى وتە مەيىرىمدى. ماعان اس مازىرلەرى قاتتى ۇنادى, – دەيدى نيدەرلاندىق قاتىسۋشى ماكس بريمان.
ەسكە سالساق, مۇنداي جارىس مارەسى وسكەمەندە ەكىنشى رەت ۇيىمداستىرىلدى. بيىلعى دوداعا وتىزدان استام ەلدەن ءجۇز سەگىز كوماندا قاتىستى. ولاردىڭ ىشىندە نيدەرلاند, اقش, ۇلىبريتانيا, كانادا, ءتىپتى مۇحيت اسىپ, اۋستراليادان دا كەلگەندەر بار. جارىس جولىنا ەرلەرمەن ۇزەڭگى قاعىستىرا نازىك جاندىلار دا شىقتى.
سونىڭ ءبىرى – اقش نامىسىن قورعاپ, ساياحاتقا شىققان مورەي مەديسون. ماماندىعى – بالاباقشا تاربيەشىسى. كۇندەلىكتى كۇيبەڭ تىرشىلىكتەن ءسال ءۇزىلىس قاجەت بولعان سوڭ وسىناۋ ساپارعا شىققان.
– قازاقستانعا العاش كەلۋىم. مەنىڭ ساياحاتىمداعى 32-ەل. اسىرەسە استانا قالاسى قاتتى اسەر قالدىردى. جولدا كولىگىمىز بىرنەشە رەت بۇزىلدى. بىراق قازاقستاندىقتار كومەكتەستى. جولاي ۇشىراسقان ەۆاكۋاتور جۇرگىزۋشىسى ءبىزدى الىستاعى قالاعا تەگىن جەتكىزدى. قازاقستان جۇرەگىمدە ماڭگى قالادى. ال استاناعا مىندەتتى تۇردە قايتا ورالامىن, – دەدى مورەي مەديسون.
«Mongol Rally» قاتىسۋشىلارىن وسكەمەندىكتەر قۇشاق جايا قارسى الىپ, زور قۇرمەت كورسەتتى. وبلىس باسشىسى نۇرىمبەت ساقتاعانوۆ تا شاراعا ارنايى كەلىپ, ساياحاتشىلاردى قۇتتىقتادى.
وسكەمەن
