«قاراسورا-2025» جەدەل-پروفيلاكتيكالىق ءىس-شاراسى اياسىندا جامبىل وبلىسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى قىزمەتكەرلەرى قر ىشكى ىستەر مينيسترلىگىنىڭ ەسىرتكى قىلمىسىنا قارسى ءىس-قيمىل كوميتەتىنىڭ ۇيلەستىرۋىمەن جانە ۇلتتىق ۇلاننىڭ №5514 اسكەري ءبولىمىنىڭ اسكەري قىزمەتشىلەرىنىڭ قاتىسۋىمەن ارنايى وپەراتسيا وتكىزدى.
شۋ اۋدانىنىڭ قۇمدى ايماعىندا جەدەل اقپاراتتى جۇزەگە اسىرۋ كەزىندە ەكى جەرگىلىكتى تۇرعىن قولعا ءتۇستى. جەردى تەكسەرۋ بارىسىندا ەرەكشە ءيىسى بار وسىمدىك تەكتەس زات ساقتالعان شاتىر انىقتالىپ, ايعاق زات رەتىندە تاركىلەندى.
«سوت-حيميالىق ساراپتاما قورىتىندىسىنا سايكەس, تاركىلەنگەن زاتتىڭ جالپى سالماعى 206 كەلى 220 گرامم كەپتىرىلگەن ماريحۋانا ەكەنى بەلگىلى بولدى», دەلىنگەن حابارلامادا.
اتالعان دەرەك بويىنشا قر قىلمىستىق كودەكسىنىڭ 297-بابى 3-بولىگىنە (ەسىرتكى قۇرالدارىن نەمەسە پسيحوتروپتىق زاتتاردى وتكىزۋ ماقساتىندا زاڭسىز الۋ, ساقتاۋ, تاسىمالداۋ, جونەلتۋ نە وتكىزۋ) سايكەس سوتقا دەيىنگى تەرگەپ-تەكسەرۋ باستالدى.
ۇستالعاندار ۋاقىتشا ۇستاۋ يزولياتورىنا قامالدى, تەرگەۋ امالدارى جۇرگىزىلىپ جاتىر.
