پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ ايتۋىنشا, جاڭا بيۋدجەت كودەكسىنىڭ قاعيدالارى ەسكەرىلىپ, 2026-2028 جىلدارعا ارنالعان قارجىلىق بولجام جاسالعان.
«2026 جىلى جەرگىلىكتى بيۋدجەتتەردىڭ كىرىسى شامامەن 10,7 تريلليون تەڭگە بولسا, 2028 جىلعا قاراي بۇل كورسەتكىش 13,3 تريلليون تەڭگەگە جەتەدى دەپ كۇتىلۋدە. ال شىعىستار كولەمى 2026 جىلى 14,9 تريلليون تەڭگەنى قۇراسا, 2028 جىلعا قاراي 18,7 تريلليون تەڭگەگە دەيىن وسەدى», دەدى مينيستر.
وسى ەسەپتىڭ نەگىزىندە رەسپۋبليكالىق بيۋدجەتتەن وڭىرلەرگە بولىنەتىن سۋبۆەنتسيالار كولەمى 2026 جىلى 5,1 تريلليون تەڭگە بولىپ بەلگىلەنگەن. ال دونور سانالاتىن وڭىرلەردەن رەسپۋبليكالىق بيۋدجەتكە تۇسەتىن قارجى كولەمى 879,9 ميلليارد تەڭگەنى قۇرايدى.
وسى بولجام بويىنشا, 2028 جىلى پاۆلودار وبلىسى سۋبۆەنتسيا الاتىن وڭىرلەر قاتارىنان شىعىپ, ءوزىن-ءوزى قارجىلاي قامتاماسىز ەتەتىن ايماققا اينالماق. بۇل – وبلىستىڭ سالىق بازاسىنىڭ كەڭەيىپ, وندىرىستىك جانە ەكونوميكالىق الەۋەتىنىڭ ارتا تۇسكەنىن كورسەتەدى.
