فوتو: Turizm jane sport ministrligi
IFLA (International Federation of Library Associations) – كىتاپحانا سالاسىنداعى ەڭ ءىرى حالىقارالىق ۇيىم, ول وزىق تاجىريبەنى زەردەلەپ, جاھاندىق ستاندارتتار ازىرلەيدى جانە كاسىبي قاۋىمداستىقتاردى دامىتادى.
كونگرەسكە ۇلتتىق كىتاپحانالاردىڭ باسشىلارى, حالىقارالىق ۇيىمداردىڭ وكىلدەرى, اكادەميالىق جانە عىلىمي ورتادان كەلگەن مامانداردى قوسا العاندا, 114 ەلدەن شامامەن 1700 دەلەگات قاتىستى. ەڭ ءىرى دەلەگاتسيالار قاتارىندا اقش, قىتاي, كورەيا رەسپۋبليكاسى, گەرمانيا بولدى. قاتىسۋشىلاردىڭ تورتتەن ءبىر بولىگىنە جۋىعى ەۋروپا ەلدەرىنەن كەلدى.
تۋريزم جانە سپورت مينيسترلىگىنىڭ ءباسپاسوز قىزمەتىنىڭ مالىمدەۋىنشە, كونگرەسس اياسىندا الەمنىڭ ءارتۇرلى ەلىنەن 29 كومپانيا قاتىسقان حالىقارالىق كورمە ءوتتى. قاتىسۋشىلار اراسىندا ISSN حالىقارالىق ورتالىعى, امەريكاندىق كىتاپحانا قاۋىمداستىعى, كورول ابدۋلازيز اتىنداعى قوعامدىق كىتاپحانا, مۇحاممەد بين راشيد ءال-ماكتۋم كىتاپحاناسى قورى, سونداي-اق Taylor & Francis, Springer-Verlag سىندى جەتەكشى ۇيىمدار مەن باسپالار بار.
«IFLA العاش رەت كونگرەستى ورتالىق ازيادا وتكىزىپ وتىر, بيىل بىزدە بۇل شاراعا العاش رەت كەلگەن دەلەگاتتاردىڭ ۇلەسى ەڭ جوعارى بولدى. ءبىز بۇل كونگرەستى كىتاپحانا-اقپاراتتىق قىزمەتتەردىڭ تۇراقتى دامۋىنىڭ ۇلتتىق ستراتەگياسىن ازىرلەۋگە, كاسىبي دامۋعا جاعداي جاساۋعا جانە وتاندىق كىتاپحانالاردىڭ جاھاندىق كاسىبي جەلىگە ودان ءارى ىقپالداسۋىنا تۇرتكى بولاتىن ماڭىزدى الاڭ رەتىندە قاراستىرامىز», دەدى IFLA پرەزيدەنتى ۆيكي ماكدونالد.
ءتورت كۇن بويى كونگرەسس الاڭىندا كىتاپحانا سالاسىنداعى زاماناۋي ۇردىستەر, تسيفرلىق يننوۆاتسيالار جانە تۇراقتى دامۋ ماسەلەلەرى تالقىلاندى. باعدارلامادا جاساندى ينتەللەكت, ۇلكەن دەرەكتەر, تسيفرلىق كىتاپحانالار, ينكليۋزيا جانە قورلاردى ساقتاۋ تاقىرىپتارىنا ارنالعان 86 سەسسيا مەن 15 قوسىمشا ءىس-شارا ءوتتى. كونگرەسس كىتاپحانا جانە باسپا ىسىندەگى يننوۆاتسيالىق شەشىمدەردى ۇسىنىپ قانا قويماي, اقپارات پەن ءبىلىم سالاسىنداعى حالىقارالىق ىنتىماقتاستىقتى دا نىعايتتى.
