فوتو: قر باسەكەلەستىكتى قورعاۋ جانە دامىتۋ اگەنتتىگى
تالداۋ ناتيجەلەرى بويىنشا, «Documentolog» جشس «Documentolog» جۇيەسىنىڭ پايدالانۋشىلارى مەن «Work Space», «Meta Doc», «Somnium» سياقتى وزگە جۇيەلەردىڭ پايدالانۋشىلارى اراسىنداعى حات الماسۋعا كەدەرگى كەلتىرگەنى انىقتالدى. ەلەكتروندىق قۇجاتتاردى قابىلداماۋعا جول بەرمەۋ جونىندەگى تالاپقا (قرنىڭ «ەلەكتروندىق قۇجات جانە ەلەكتروندىق تسيفرلىق قولتاڭبا تۋرالى» زاڭىنىڭ 24-بابى) قاراماستان, سەرىكتەستىك ءۇش جىل بويى حات-حابار الماسۋدى بۇعاتتاپ كەلگەن. بۇدان بولەك, ول حات-حاباردى تەك ءوزىنىڭ شليۋزى («قازاقستاندىق ەلەكتروندىق دەرەكتەر الماسۋ ورتالىعى») ارقىلى اقىلى نەگىزدە قابىلداۋدى قاراستىرعان.
جۇرگىزىلگەن تالداۋ قورىتىندىسى بويىنشا, «Documentolog» جشس 2021-2024 جىلدار ارالىعىندا نارىقتاعى ۇستەمدىك جاعدايدى يەلەنگەن سۋبەكت دەپ تانىلدى. اگەنتتىك تاراپىنان كومپانياعا ۇستەم جاعدايدى تەرىس پايدالانۋدىڭ بەلگىلەرى تۋرالى حابارلاما جولدانعانىمەن, بيزنەس-سۋبەكت اتالعان قۇجاتتى مويىنداعان جوق. وسىعان بايلانىستى 2025 جىلعى ءساۋىر ايىندا بقدا-نىڭ استانا قالاسى بويىنشا دەپارتامەنتى تەرگەۋ باستاعان بولاتىن.
تەرگەۋدى توقتاتۋ تۋرالى تالاپ-ارىزبەن سەرىكتەستىك (استانا قالاسىنىڭ ارنايى اۋدانارالىق اكىمشىلىك) سوتقا جۇگىندى. الايدا سوت ءبىرىنشى ينستانتسيادا ءىستى قاراۋ ناتيجەسىندە سەرىكتەستىڭ تالاپتارىن قاناعاتتاندىرۋدان باس تارتتى.
سونداي-اق تسيفرلاندىرۋ سالاسىنداعى ۋاكىلەتتى ورگان (تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى) تاراپىنان دا شارالار قابىلدانىپ, سەرىكتەستىككە بۇزۋشىلىقتى جويۋ تۋرالى اكت ەنگىزىلدى. قابىلدانعان شارالاردىڭ ناتيجەسىندە, قازىرگى ۋاقىتتا سەرىكتەستىك قۇجاتتاردى جەتكىزبەۋ تاجىريبەسىن توقتاتتى, ال «Documentolog» جۇيەسىنە حات-حابار اتالعان شليۋز ارقىلى كەدەرگىسىز قابىلدانىپ جاتىر.
سونىمەن قاتار, اعىمداعى جىلى سەرىكتەستىك «Documentolog» باعدارلامالىق قامتاماسىز ەتۋگە بەرىلگەن ليتسەنزيالاردى مينيسترلىكتىڭ بالانسىنا وتكىزدى, الايدا زياتكەرلىك مەنشىك وبەكتىلەرىنە, سونىڭ ىشىندە باستاپقى كودقا ايرىقشا قۇقىقتاردى وزىندە قالدىردى.
نارىق قاتىسۋشىلارى بەرىلگەن ليتسەنزيالار سەرىكتەستىكتىڭ وسى نارىقتاعى ۇستەم جاعدايىن ساقتاپ قالاتىنىن جانە وزگە ەلەكتروندىق قۇجات اينالىمى جۇيەلەرىن جەتكىزۋگە كەدەرگى جاسايتىنىن ايتىپ الاڭداۋشىلىق ءبىلدىرىپ جاتىر.
بۇدان بولەك, «Documentolog» باعدارلامالىق قامتاماسىز ەتۋدى كۇتىپ-ۇستاۋعا بولاشاقتا شىعىندار قاجەت بولعاندىقتان, مەملەكەت جىل سايىن تەحنيكالىق قىزمەت كورسەتۋدى (جاڭارتۋ, باعدارلامانى جەتىلدىرۋ, تەحنيكالىق قولداۋ بويىنشا كولل-ورتالىق جۇمىسى جانە ت.ب.ء) دال وسى قۇقىق يەلەنۋشىدەن – جوعارىدا اتالعان جشس-دەن ساتىپ الۋعا ءماجبۇر بولادى.
جۇرگىزىلگەن تالداۋ مەن تەرگەۋ ناتيجەلەرى بويىنشا بقدا ءتيىستى ۇسىنىمدار ازىرلەپ, ولاردى شەشىم قابىلداۋ ءۇشىن ۋاكىلەتتى مەملەكەتتىك ورگاندارعا جولدايدى. اگەنتتىك تاراپىنان بۇل باعىتتاعى جۇمىس جالعاسىن تابادى.
