كوللاجدى جاساعان – امانگەلدى قياس, «EQ»
وتاندىق تاۋار وندىرۋشىلەردىڭ بىرىڭعاي ءتىزىلىمى جاسالادى وندا وندىرۋشىلەر تۋرالى ناقتى دەرەكتەر جيناقتالىپ, ولارعا مەملەكەتتىك قولداۋ شارالارىنا, سونداي-اق مەملەكەتتىك جانە كۆازيمەملەكەتتىك ساتىپ الۋلارعا قول جەتكىزۋ مۇمكىندىگى قامتاماسىز ەتىلەدى.
ۇكىمەتتىڭ ءباسپاسوز قىزمەتىنىڭ مالىمدەۋىنشە, ساۋدانى ىنتالاندىرۋ جانە دۇكەن سورەلەرىندەگى وتاندىق تاۋارلار ۇلەسىن ارتتىرۋ ماقساتىندا وتاندىق وندىرۋشىلەر ونىمدەرى ءۇشىن كەمىندە 50% سورەلىك كەڭىستىكتى كوزدەيتىن باعدارلاما ىسكە قوسىلدى.
سونىمەن قاتار ساپاسىز ءارى قاۋىپتى ونىمدەردىڭ ىشكى نارىققا ەنۋىنە شەكتەۋ قويۋ باعىتىندا بەلسەندى جۇمىس جۇرگىزىلىپ جاتىر.
«بارلىق باقىلاۋشى ورگانداردىڭ قاتىسۋىمەن احۋالدىق شتاب ءتيىمدى جۇمىس اتقارىپ جاتىر. 47 مىڭنان استام كولىك تەكسەرىلدى, تاۋارلىق سالماقتا بۇل 600 مىڭ توننادان استام مال شارۋاشىلىعى ونىمدەرى. ونىڭ ىشىندە 900-دەن استام اۆتوكولىك كەرى قايتارىلدى, 1 مىڭنان استام سايكەستىكتى راستاۋ قۇجاتتارىنىڭ كۇشى جويىلدى», دەپ اتاپ ءوتتى ساۋدا جانە ينتەگراتسيا ءمينيسترى ارمان شاققاليەۆ.
