اتىراۋ بالىقشىلارى 125 كيلولىق الىپ بەكىرەنى ۇستادى

اتىراۋ. 23 ماۋسىم. اتىراۋدا بالىقشىلار تورىنا سالماعى 125 كيلو تارتاتىن الىپ بەكىرە بالىعى ءتۇستى. بۇل تۋرالى egemen.kz ءتىلشىسى حابارلادى. وتكەن سەنبىدە «تىلەكشى» سەرىكتەستىگىنىڭ بالىقشىلارى جايىق وزەنىنىڭ تومەنگى ساعاسىنان سالماعى 125 كيلو تارتاتىن الىپ بەكىرە تۇقىمداس باعالى بالىقتى ۇستادى. الىپ بالىقتىڭ ۇزىندىعى 2 مەتر 30 سانتيمەتردى قۇرايدى. بالىقشىلار سالماعى اۋىر بالىقتى ارنايى ىدىسپەن اتىراۋ بەكىرە زاۋىتىنا جەتكىزدى. زاۋىت ديرەكتورى راشيدين كاليمۋلليننىڭ ايتۋىنشا, باعالى بالىقتىڭ باسىندا جانە دەنەسىندە ءتۇرلى جاراقاتتارى بار. السىرەۋى بايقالادى. «براكونەرلەر تورىنا تۇسكەن بولۋى مۇمكىن» دەگەن جورامال دا ايتىلادى. «جاراقاتى بار بالىق ءبىر اپتاداي زاۋىت ماماندارىنىڭ باقىلاۋىندا بولادى», – دەدى زاۋىت ديرەكتورى راشيدين كاليمۋللين. بەكىرە بالىعى زاۋىتتا ارنايى كۇتىمگە قالدىرىلا ما, الدە تەڭىز ايدىنىنا قايتا جىبەرىلە مە؟ وسى ساۋالعا بايلانىستى زاۋىت ماماندارى ازىرگە ناقتى شەشىم قابىلداي قويعان جوق. جولداسبەك شوپەعۇل. دەرەك: egemen.kz. سۋرەت: راحيم قويلىباەۆ.