استانا. 23 ماۋسىم. تۇركيانىڭ ءبىر تۇرعىنى ءوز ءۇيىنىڭ استىنان بۇدان مىڭ جىل بۇرىن تىرشىلىك ەتكەن تۇتاس قالانىڭ قۇرىلىسىن تاپتى. بۇل تۋرالى islam-today.ru سايتىنا سىلتەمە جاساپ ras.kz حابارلادى.
عالىمداردىڭ پايىمىنشا, دەرينكۋيۋ, ياعني «تەرەڭ قۇدىق» – جەر استى قالاسىندا سول زاماندا 20 مىڭ ادام تۇرعان. ول 60 مەتر تەرەڭدىكتەگى سەگىز دەڭگەيلى كەشەن بولىپ شىقتى. بىراق ول جەراستى قالاسىنىڭ ءبىر بولىگى عانا ەكەن, قالعان بولىكتەرى ءالى قازىلماعان.
جەردىڭ استىنداعى قالانىڭ ورنىن ارشىپ الۋ تىم قيىنعا تۇسپەگەن. جۇرت سودان كەيىن ءوز وتباسىلارىمەن سوندا بارىپ تۇرا باستاعان. ال دەرينكۋيۋدىڭ قۇرىلىسى ۆيزانتيا داۋىرىندە, VII-VIII عاسىرلاردا سالىنىپ, كەڭەيتىلە تۇسكەن كورىنەدى.
قالانىڭ ءبىرىنشى دەڭگەيىندە ات قوراسى, ءجۇزىم سىعاتىن اپپارات جانە ۇلكەن كۇمبەز تۇرعان. ودان گورى تەرەڭىرەكتە تۇرعىن جايلار, ءاسۇي مەن شىركەۋ بولعان.
تۇركياداعى نەۆشەحير قالاسى بەكىنىسى جانىندا ءجۇرىپ جاتقان قۇرىلىس جۇمىستارى بارىسىندا 2014 جىلعى جەلتوقساندا تاعى ءبىر جەراستى قالاسى تابىلدى. ارحەولوگتاردىڭ الدىن الا مالىمەتتەرى بويىنشا, تابىلعان كونە قالا بۇدان بەس مىڭ جىل بۇرىن تىرشىلىك ەتكەن. ونىڭ جەراستى گالەرەياسىنىڭ ۇزىندىعى كەمىندە 7 شاقىرىم بولعان, ال اۋدانى 45 گەكتار دەپ سانالىپ وتىر.
جاڭادان تابىلعان جەراستى قالاسىن ارشىپ الۋ جۇمىستارى ءالى جالعاسىپ جاتىر.
تالعات رايىمبەك.
دەرەك, سۋرەت: ras.kz.
