ەڭبەك مينيسترلىگى جاڭا زەينەتاقى مولشەرىن جاريالادى

جىل باسىنان بەرى رەسپۋبليكالىق بيۋدجەتتەن 2 ترلن 451,4 ملرد تەڭگە كولەمىندە زەينەتاقى تولەمدەرى جۇزەگە اسىرىلدى, ونىڭ ىشىندە:

• بازالىق زەينەتاقى تولەمىنە – 793 ملرد تەڭگە,

• ىنتىماقتى زەينەتاقى تولەمىنە – 1 ترلن 658,4 ملرد تەڭگە باعىتتالعان.

2025 جىلعى 1 تامىزداعى جاعداي بويىنشا رەسپۋبليكالىق بيۋدجەتتەن تولەنەتىن جيىنتىق زەينەتاقىنىڭ ورتاشا مولشەرى 143 097 تەڭگەنى قۇرادى.
ونىڭ ىشىندە:

• ىنتىماقتى زەينەتاقى – 95 491 تەڭگە,

• بازالىق زەينەتاقى – 47 606 تەڭگە.

بۇعان دەيىن حابارلانعانداي, 2025 جىلعى 1 قاڭتاردان باستاپ بازالىق زەينەتاقى تولەمىنىڭ مولشەرى ۇلتتىق بانك ايقىنداعان بولجامدى ينفلياتسيا دەڭگەيىنە (6,5%) سايكەس ۇلعايتىلدى, ال ىنتىماقتى زەينەتاقى 8,5%-عا ءوستى, ياعني ينفلياتسيا دەڭگەيىنەن 2%-عا ارتىق.

سونىمەن قاتار, مەملەكەت باسشىسىنىڭ تاپسىرماسى بويىنشا 2023 جىلدان باستاپ بەس جىل ىشىندە ەڭ تومەنگى بازالىق زەينەتاقى مولشەرىن كۇنكورىس مينيمۋمىنىڭ 70%-ىنا, ال ەڭ جوعارعى مولشەرىن 120%-ىنا دەيىن كەزەڭ-كەزەڭىمەن جىل سايىن ارتتىرۋ جۇزەگە اسىرىلىپ جاتىر.

وسىعان سايكەس, 2025 جىلعى 1 قاڭتاردان باستاپ ەڭ تومەنگى بازالىق زەينەتاقى كۇنكورىس مينيمۋمىنىڭ 65%-ىنان 70%-ىنا دەيىن ۇلعايتىلىپ, 32 360 تەڭگەنى قۇرادى, ال ەڭ جوعارعى مولشەرى 105%-دان 110%-عا دەيىن ءوسىپ, 50 851 تەڭگەنى قۇرادى.

ايتا كەتەيىك, 2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى ءار الۋشىعا جەكە تاعايىندالادى, ونىڭ زەينەتاقى جۇيەسىنە قاتىسۋ ءوتىلى ەسكەرىلەدى.

بۇل رەتتە زەينەتاقى جۇيەسىنە قاتىسۋ وتىلىنە 1998 جىلعى 1 قاڭتارعا دەيىن ىنتىماقتى جۇيەدە جيناقتالعان ەڭبەك ءوتىلى جانە مىندەتتى زەينەتاقى جارنالارى (مزج) تولەنگەن كەزەڭدەر ەنگىزىلەدى.

مىسالى:

• ەگەر زەينەتاقى جۇيەسىنە قاتىسۋ ءوتىلى 10 جىل نەمەسە ودان از بولسا, سونداي-اق قاتىسۋ ءوتىلى مۇلدەم بولماسا, بازالىق زەينەتاقى مولشەرى كۇنكورىس مينيمۋمىنىڭ 70%-ىن قۇرايدى.

• ءاربىر قوسىمشا جىل ءۇشىن بۇل مولشەر 2%-عا ارتىپ وتىرادى.

• ماسەلەن, 20 جىلدىق قاتىسۋ وتىلىندە بازالىق زەينەتاقى كۇنكورىس مينيمۋمىنىڭ 90%-ىن قۇرايدى.

• 30 جىل جانە ودان دا كوپ ءوتىل بولعان جاعدايدا بازالىق زەينەتاقى ەڭ جوعارى مولشەردە — كۇنكورىس مينيمۋمىنىڭ 110%-ى كولەمىندە بەلگىلەنەدى.

ەگەر ءبىر اي ىشىندە بىرىڭعاي جيناقتاۋشى زەينەتاقى قورىنا (بجزق) بىرنەشە رەت مزج اۋدارىلسا, جيناقتاۋشى جۇيەگە قاتىسۋ مەرزىمى ءبارىبىر ءبىر اي بولىپ ەسەپتەلەدى.

وسىلايشا, مىندەتتى زەينەتاقى جارنالارى نەعۇرلىم تۇراقتى ءارى تولىق كولەمدە تولەنسە, زەينەت جاسىنا جەتكەن كەزدە بازالىق زەينەتاقى تولەمىنىڭ مولشەرى دە سوعۇرلىم جوعارى بولادى.

ءوز كەزەگىندە, جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى ەڭبەك وتىلىنە (كەمىندە 6 اي قاجەت) جانە زەينەت جاسىنا دەيىنگى ورتاشا ايلىق تابىسقا بايلانىستى.