كيەلى سىر بويىندا ومىرگە كەلگەن قىلقالام شەبەرى جاس كۇنىنەن بەينەلەۋ ونەرىنە ىنتىق بولدى. الماتىداعى كوركەمسۋرەت ۋچيليششەسىن اياقتاعاننان كەيىن, ءبىلىمىن ودان ءارى ۆ.ي.سۋريكوۆ اتىنداعى ماسكەۋ مەملەكەتتىك كوركەمسۋرەت ينستيتۋتىندا جالعاستىردى. سوندا وقىپ ءجۇرىپ, بىرەگەي ونەر تارلاندارىنان ءتالىم الدى.
تالانتتى سۋرەتشى بەينەلەۋ ونەرىنىڭ بارلىق جانرىنا قالام تەربەدى. اسىرەسە ا.دۇزەلحانوۆ كەسكىندەمە جانرىندا ەرەكشە قولتاڭباسىن قالدىردى. ول «التىن سارباز», «تۇركىستان», «ورداباسى», «كوروعلى», «وعىز حان» اتتى تۋىندىلارىمەن ۇلتتىق بەينەلەۋ ونەرىنىڭ قازىناسىن بايىتتى. سونداي-اق «قورقىت», «ابىلاي حان», «ابىلقايىر حان», «تولە بي», «قازىبەك بي», «ايتەكە بي» اتتى پورترەتتەرى ارقىلى تاريحي تۇلعالاردىڭ بەينەسىن ءتىرىلتتى. ال «تۇمار پاتشايىم», «قىز جىبەك», «قىز ۇزاتۋ», «ايمان-شولپان» اتتى كارتينالارىمەن قازاق ارۋلارىنىڭ سۇلۋلىعىن ايشىقتى كوركەمدەدى.
كورنەكتى كەسكىندەمەشى وتاندىق كىتاپ يلليۋستراتسيا سالاسىن دامىتۋعا دا سۇبەلى ۇلەس قوستى. ونەر مايتالمانى كوزى تىرىسىندە تاريحي, فولكلورلىق تاقىرىپتار مەن بالالارعا ارنالعان ەكى جۇزدەن استام كىتاپ پەن الەۋمەتتىك جانە تاريحي تاقىرىپتاعى ەلۋدەن اسا پلاكاتتى اسەم بەزەندىرگەن. قانشاما شاكىرت تاربيەلەپ, ۇلاعاتتى ۇستاز بولدى. پروفەسسور اتاندى. جوعارى وقۋ ورىندارىنىڭ ستۋدەنتتەرىنە ارناپ گرافيكالىق ونەر تەحنيكاسى بويىنشا وقۋ-ادىستەمەلىك قۇرالىن جازدى.
بۇگىندە اعىمسالى دۇزەلحانوۆتىڭ تاريحي تۋىندىلارى ەل پرەزيدەنتىنىڭ رەزيدەنتسياسىندا, سونداي-اق جوعارى مەملەكەتتىك مەكەمەلەردىڭ تورىنەن ورىن العان. بىرقاتار شىعارمالارى ەلىمىزدەگى مۋزەيلەر مەن شەتەلدەگى مۇراجايلاردا ساقتاۋلى تۇر. ءبىرتۋار شەبەردىڭ ەسىمى ەلىمىزگە عانا ەمەس, الىس-جاقىن شەت مەملەكەتتەرگە دە جاقسى تانىس. وسى عاسىر باسىندا الەمنىڭ 100-دەن استام ەلىنەن كەلگەن سۋرەتشىلەر قاتىسقان بۇۇ نيۋ-يوركتە (اقش) ۇيىمداستىرعان «گلوبال ارت-2000» حالىقارالىق كورمەسىندە توپ جارىپ, دۇنيەجۇزىنىڭ ۇزدىك 33 قىلقالام شەبەرىنىڭ قاتارىنا ەندى.
مىنە, وسىنداي وتاندىق بەينەلەۋ ونەرىنە ولشەۋسىز ۇلەس قوسقان تالانتتى تۇلعا بابالار كەتكەن ماڭگىلىك جولعا بەت بۇردى. بىراق ونىڭ عاجايىپ شىعارمالارى بار دا ايتۋلى قىلقالام شەبەرىنىڭ ەسىمى ەشقاشان ۇمىتىلمايدى.
