سۋرەتتى تۇسىرگەن – اۆتور
شىعىستا ءداستۇرلى بال فەستيۆالى وڭىردە وسىمەن جەتىنشى رەت ءوتىپ وتىر. مەرەكەنىڭ ءبىر ەرەكشەلىگى, ەلىمىزدەگى بارلىق ۇلت پەن ۇلىستىڭ ءداستۇرىن ناسيحاتتاپ, دوستىق قارىم-قاتىناستى نىعايتۋ ماقساتىندا وتكىزىلەدى. سوندىقتان دا بولار, اتالعان ءىس-شاراعا قاتىسۋشىلار سانى جىل ساناپ كوبەيىپ كەلەدى. بيىل مارتەبەلى قوناقتار رەسەيدىڭ سوناۋ التاي ولكەسىنەن دە ات ارىتىپ كەلگەن. ۇزدىك بال كورمەسىنە 16 ومارتاشىنىڭ ونىمدەرى ۇسىنىلعان. كورمەگە كەلگەندەردىڭ ءبىرى اننا بەرديۋگينا وسى كاسىپپەن 20 جىلدان بەرى ۇزدىكسىز اينالىسىپ كەلەدى. كۇيەۋى ومارتاشىلار اۋلەتىنىڭ ءۇشىنشى ۇرپاعى. كورمەگە شامامەن 500 كگ بال اكەلگەن.
«بالدىڭ ءدامى, ونىڭ ءنارى ارانىڭ جايىلۋ القابىنا بايلانىستى. بىزدە بالدىڭ بەس ءتۇرى بار. ايتار بولساق, مامىرداعى ءتۇرلى ءشوپتىڭ توزاڭىنان جينالعان بال, دالا جانە ورمان بالى, قاراقۇمىق بالى, اتاقتى التاي بالى. ال ەمگە قويۋ ءتۇستى بالدى پايدالانعان ءجون. ويتكەنى ولاردىڭ دياستازى كوبىرەك, ساپاسى جوعارى. اسىرەسە تۇماۋ بولعاندا پايدالانسا, تاپتىرماس ەم», دەيدى اننا بەرديۋگينا.
مەرەكەلىك كەشكە كەلگەن كوپشىلىكتىڭ كوڭىل كۇيى كوتەرىڭكى. فەستيۆالعا قاتىسقان ونەرپازدار ءان اۋەلەتىپ, مىڭ بۇرالا بي بيلەدى. كورشىلەس ەل دەمەكشى, شىعىستىڭ بالى ىشكى نارىقپەن عانا شەكتەلمەي, شەتەلگە دە شىعىپ جاتىر. بىلتىر 19,3 توننا بال ەكسپورتتالدى دەسەك, ول الدىڭعى جىلمەن سالىستىرعاندا ايتارلىقتاي جوعارى.
باتىس التايدا ارا ءوسىرىپ, بال ساقتاعان ومارتاشىلاردىڭ ورتاق مەرەكەسى وسىلاي تويلانادى. وبلىستىق اۋىل شارۋاشىلىعى باسقارماسى ماماندارى دا ارا شارۋاشىلىعىن ساقتاۋ ءۇشىن ومارتاشىلارعا جان-جاقتى قولداۋ كورسەتۋدى جالعاستىراتىنىن ايتتى.
شىعىس قازاقستان وبلىسى,
ريددەر قالاسى
