باعا مەن تاريف
قىركۇيەكتەن باستاپ كەي وڭىرلەردە ەلەكتر جارىعىنىڭ ءتاريفى كوتەرىلۋى ىقتيمال. ماسەلەن, «اتىراۋ جارىق» كومپانياسى باعانى ءوسىرۋ جونىندە ۇسىنىسىن جىبەرىپ قويعان. قۇجات ماقۇلدانسا, تۇرعىنداردىڭ ەلەكتر جارىعىنا تولەيتىن اقشاسى ارتادى.
كوممۋنالدىق تاريفتەرگە قاتىستى دا اڭگىمە كوپ. پرەمەر-مينيستر ولجاس بەكتەنوۆ «باعالاردى نارىقتىق دەڭگەيگە جەتكىزۋ قاجەت» دەگەن ەدى. دەگەنمەن, ازىرگە IV توقسانداعى جوسپارلانعان قىمباتتاۋ كەيىنگە شەگەرىلدى. بىراق حالىق «قىسقا قاراي تاريف تاعى قىمباتتايدى ما؟» دەپ الاڭداپ وتىر.
اڭدۋشىعا جاڭا ايىپپۇل
16 قىركۇيەكتەن باستاپ ستالكينگ, ياعني بىرەۋدى اڭدۋ نەمەسە قۋدالاۋ ءۇشىن قاتاڭ جازا قاراستىرىلدى. بۇدان بىلاي مۇنداي ارەكەت جاساعاندار 200 اەك-كە دەيىن (شامامەن 786 مىڭ تەڭگە) ايىپپۇل تولەيدى نەمەسە قوعامدىق جۇمىسقا تارتىلادى, ءتىپتى 50 تاۋلىككە دەيىن قاماۋعا الىنۋى مۇمكىن.
ال ەگەر قۋدالاۋ كۇش قولدانۋمەن, قورقىتۋمەن نەمەسە جەكە ومىرگە قول سۇعۋمەن بايلانىستى بولسا, ول قىلمىستىق ىسكە ۇلاسادى. بۇل – قوعامداعى جەكە ەركىندىكتى قورعاۋعا باعىتتالعان ماڭىزدى قادام.
ءۇي يەلەرىنە ءۇش ءتۇرلى تولەم
15 قىركۇيەكتەن باستاپ پاتەر يەلەرىنىڭ تۇبىرتەگىندە ءۇش ءتۇرلى جارنا پايدا بولادى. ءبىرىنشىسى – ءۇيدى كۇندەلىكتى كۇتىپ-ۇستاۋعا جۇمسالاتىن قاراجات. ەكىنشىسى – كۇردەلى جوندەۋ جۇمىستارىنا ارنالعان قور. ءۇشىنشىسى – بەينەباقىلاۋ, قاقپا ورناتۋ سەكىلدى قوسىمشا جۇمىستار.
جاڭا تارتىپكە سايكەس تولەم كولەمى ءار پاتەردىڭ نەمەسە قويما, اۆتوتۇراق سەكىلدى نىساننىڭ اۋدانىنا قاراي ەسەپتەلەدى. بۇل وزگەرىس تۇرعىن ءۇيدى باسقارۋداعى اشىقتىقتى قامتاماسىز ەتىپ, قاراجاتتىڭ «جوعالىپ كەتپەۋىنە» جول بەرمەك.
ستۋدەنتتەرگە ءسۇيىنشى
ءبىلىم قۋعان جاستار ءۇشىن قىركۇيەك جاقسى جاڭالىقپەن باستالماق. ستۋدەنتتىك ستيپەنديا تاعى دا كوتەرىلەدى. ەندى باكالاۆرلار اي سايىن 52,3 مىڭ تەڭگە, ماگيسترانتتار 117 مىڭ تەڭگە, ال دوكتورانتتار 262,5 مىڭ تەڭگە الادى.
بۇل – 2020 جىلدان بەرى جالعاسىپ كەلە جاتقان كەزەڭ-كەزەڭىمەن ءوسىرۋدىڭ سوڭعى ساتىسى.
ءموبيلدى بايلانىس
Altel مەن Tele2 «شەكسىز الەم» اتتى جاڭا قىزمەتتى ىسكە قوسپاق. ول ارقىلى 49 ەلدە جۇرگەن قازاقستاندىقتار الەۋمەتتىك جەلىلەردى, مەسسەندجەرلەردى جانە كارتالاردى شەكتەۋسىز پايدالانا الادى. باعاسى ءۇش كۇنگە 2 590 تەڭگە.
ال Kcell 8 قىركۇيەكتەن باستاپ «New Happy Bonus» قىزمەتىنىڭ باعاسىن 90 تەڭگەگە دەيىن كوتەرەدى. ونىڭ ىشىندە 150 مب ينتەرنەت, 50 SMS جانە ۆيكتوريناعا قاتىسۋ مۇمكىندىگى بار.
اقشا اۋدارىمىنا قاتاڭ باقىلاۋ
ەندى ءموبيلدى اۋدارىمدار دا قاتاڭ قاداعالانادى. ەگەر ءۇش اي ىشىندە ءبىر ادام 1 ميلليون تەڭگەدەن ارتىق اقشا اۋدارسا, سالىق ورگاندارى ونى تەكسەرۋگە الادى.
بىراق بۇل تالاپ تۋىسقاندار اراسىنداعى قارجىلىق كومەككە قولدانىلمايدى. جاڭا جۇيە قاراجات اينالىمىن اشىق قىلۋدى كوزدەيدى.
مەكتەپ پەن كوللەدج
2 قىركۇيەكتەن باستاپ وقۋشىلار جاڭا وقۋ جىلىنا قادام باسادى. بيىل العاش رەت مەكتەپ تابالدىرىعىن اتتايتىندار سانى 370 مىڭعا جۋىق. سونداي-اق قىركۇيەكتەن باستاپ مەكتەپ اسحانالارى جاڭا ستاندارت بويىنشا تاماقتاندىرۋ جۇيەسىنە كوشەدى.
كوللەدجدەردە دە وزگەرىس بار. ەندى 9-سىنىپتى بىتىرگەن تۇلەكتەر ءۇشىن جۇمىسشى ماماندىقتارى تەگىن وقىتىلادى.
كاسىپكەرلەرگە جاڭا تالاپ
15 قىركۇيەكتەن باستاپ جەكە كاسىپكەر رەتىندە تىركەلۋ ءتارتىبى وزگەرەدى. بۇدان بىلاي تۇراقتى جۇمىسشى ۇستايتىن نەمەسە تابىسى 1,4 ميلليون تەڭگەدەن اساتىن ازاماتتار مىندەتتى تۇردە يپ (جەكە كاسىپكەر) رەتىندە تىركەلۋگە ءتيىس. بۇل كولەڭكەلى بيزنەستى ازايتىپ, سالىق جۇيەسىن رەتتەۋگە باعىتتالعان قادام.
الەمدە نە جاڭالىق؟
قىركۇيەكتە قازاقستان شەگىنەن تىس قىزىقتار دا كۇتىپ تۇر. Apple كومپانياسى كوپتەن كۇتكەن iPhone 17 مودەلىن تانىستىرادى. جاڭا ۇلگىلەردىڭ باعاسى 430 مىڭنان 672 مىڭ تەڭگەگە دەيىن بولۋى مۇمكىن.
ال 7 قىركۇيەكتە جەر شارىنىڭ 7 ميللياردتان استام تۇرعىنى سيرەك كەزدەسەتىن استرونوميالىق قۇبىلىستىڭ كۋاسى بولادى – تولىق اي تۇتىلۋى. وتانداستارىمىز دا بۇل عاجايىپتى تاماشالاي الادى.
