قايعىلى جاعداي 18 تامىزعا قاراعان ءتۇنى بولعان. Skoda اۆتوكولىگىنىڭ جۇرگىزۋشىسى ەسكەرتۋ بەلگىلەرىن بايقاماي, جول جوندەۋ جۇمىستارىن اتقارىپ جاتقان جۇمىسشىلاردى قاققان. وقيعا كەزىندە ەكىنشى جۇمىسشى جەڭىل جاراقات الىپ, دارىگەرلىك تەكسەرىستەن سوڭ ۇيىنە جىبەرىلدى.
استانا قالالىق پوليتسيا دەپارتامەنتىنىڭ ءباسپاسوز قىزمەتىنىڭ جەتەكشىسى ەلميرا شاۋلەنوۆا رەسمي تۇسىنىكتەمە بەردى.
– 2025 جىلعى 18 تامىزدا تۇنگى ۋاقىتتا Skoda ماركالى كولىكتىڭ جۇرگىزۋشىسى سارايشىق كوپىرىندە جول جوندەۋ جۇمىستارى جۇرگىزىلىپ جاتقانىن ەسكەرمەي, ەكى جۇمىسشىنى قاقتى. ناتيجەسىندە ءبىر جۇمىسشى وقيعا ورنىندا قازا تاپتى, ەكىنشىسى اۋرۋحاناعا جەتكىزىلدى. قىلمىستىق ءىس قوزعالدى, – دەدى ول.
قازا تاپقان جۇمىسشىنىڭ ارتىندا كامەلەتكە تولماعان ەكى بالاسى قالعان. جوندەۋ جۇمىستارىنا جاۋاپتى كومپانيا وكىلدەرى مارقۇمنىڭ وتباسىنا قولداۋ كورسەتىلەتىنىن ايتتى.
– بۇل ۋچاسكەدە تۇنگى مەزگىلدە يامالىق جوندەۋ جۇرگىزىلدى. بارلىق ەسكەرتۋ بەلگىلەرى قويىلىپ, جۇمىسشىلار ارنايى كيىمدە بولعان. جۇرگىزۋشى جول ەرەجەسىن ساقتاماعان. اتالعان جۇمىستاردى مەردىگەردىڭ سۋبمەردىگەر ۇيىمى – «زانگار-استانا» جشس اتقاردى, – دەدى جوبانىڭ جەتەكشىسى ايان كاريموۆ.
قازىرگى تاڭدا جول-كولىك وقيعاسىنا قاتىستى سوتقا دەيىنگى تەرگەۋ امالدارى باستالدى. جۇرگىزۋشىنىڭ كولىگى ايىپپۇل تۇراعىنا قويىلدى.
