جاڭا نورماعا سايكەس, بالگەرگە بارعاندارعا 375-تەن 750 سومونيگە دەيىن (شامامەن 21 900-43 800 تەڭگە) ايىپپۇل قاراستىرىلعان.
بۇعان دەيىن, 2024 جىلى, بالگەرلەردىڭ وزدەرىنە قاتىستى جازا قاتايتىلعان ەدى. قازىر ولاردىڭ قىزمەتى ءۇشىن 7,5 مىڭ سومونيگە دەيىن ايىپپۇل (شامامەن 438 مىڭ تەڭگە) نەمەسە 15 تاۋلىككە قاماۋ جازاسى قولدانىلادى. ال قايتالانعان جاعدايدا بۇل جازا الدەقايدا اۋىرلاپ, 150 مىڭ سومونيگە دەيىن ايىپپۇل (شامامەن 8,7 ملن تەڭگە) نەمەسە 2 جىلعا دەيىن تۇرمە جازاسىنا اكەلۋى مۇمكىن.
تاجىكستان ىشكى ىستەر مينيسترلىگىنىڭ دەرەگىنشە, بالگەرلەردىڭ قىزمەتىن پايدالانعاندار ارنايى بازاعا تىركەلىپ جاتىر. 2025 جىلدىڭ العاشقى التى ايىندا 495 جاعداي رەسمي تۇردە انىقتالعان.
مامانداردىڭ ايتۋىنشا, بۇل قادامنىڭ نەگىزگى ماقساتى حالىقتى الداپ, اقشا تاباتىن جالعان «ەمشىلەر» مەن «كورىپكەلدەردىڭ» جولىن كەسۋ. دەگەنمەن قوعامدا مۇنداي قاتاڭ شاراعا قاتىستى ءارتۇرلى پىكىر بار: بىرەۋلەر حالىقتى قورعاۋ ءۇشىن قاجەت دەسە, ەندى بىرەۋلەر بۇل سەنىم بوستاندىعىنا شەكتەۋ قويادى دەپ سانايدى.
