الەم نازارىنداعى كەزدەسۋ
جۇما كۇنى الياسكادا رەسەي پرەزيدەنتى ۆلاديمير پۋتينمەن كەزدەسكەن سوڭ, ترامپ كيەۆكە بەيبىت كەلىسىمگە كەلۋگە ىقپال ەتۋدى قولعا العان. اق ءۇي حابارلاۋىنشا, الدىمەن ترامپ پەن زەلەنسكي وۆال كابينەتتە جەكە جۇزدەسەدى. ودان كەيىن بارلىق ەۋروپالىق كوشباسشىلار شىعىس زالىندا باس قوسىپ, ۋكرايناعا قاتىستى ورتاق ۇستانىمدارىن تالقىلايدى.
ەۋروپا ەلدەرى بۇل كەزدەسۋگە ايرىقشا ءمان بەرىپ وتىر. ويتكەنى پۋتينمەن وتكەن سامميتكە قاتىسپاعاندىقتان, ولار ۋكراينا تاعدىرى سىرتتارىنان شەشىلىپ كەتپەي مە دەپ الاڭدايدى.
گەرمانيا سىرتقى ىستەر ءمينيسترى يوحانن ۆادەپفۋل: «الەم كوز تىگىپ وتىرعان ءسات – وسى. بۇل ۆاشينگتونداعى اقيقات كەزەڭى», دەدى.
ۋكراينا ءۋاجى
زەلەنسكي رەسەيدىڭ دونباستىڭ قالعان بولىگىنەن باس تارتۋ سەكىلدى تالاپتارىن قابىلداۋدان ءۇزىلدى-كەسىلدى باس تارتىپ وتىر. ول قازىردىڭ وزىندە اتىستى دەرەۋ توقتاتۋ ارقىلى تەرەڭ بەيبىت كەلىسسوزدەر باستاۋعا ۇندەيدى. بىراق ترامپ ءپۋتيننىڭ ۇستانىمىنا جاقىنداپ, بىردەن اۋقىمدى كەلىسىم جاساۋ جولىن قولداي باستاعانى بايقالادى.
زەلەنسكي ۆاشينگتونعا كەشكىسىن جەتكەن سوڭ Telegram ارقىلى ۇندەۋ جاساپ:
ء«بىز ءبارىمىز سوعىستىڭ تەز ءارى سەنىمدى توقتاۋىن قالايمىز. بۇل سوعىستى باستاعان – رەسەي. امەريكا مەن ەۋروپالىق دوستارىمىزبەن بىرگە كۇش بىرىكتىرىپ, ماسكەۋدى شىنايى بەيبىت كەلىسىمگە كەلتىرەمىز دەپ سەنەمىن», دەدى.
سونىمەن ۆاشينگتونداعى بۇل كەزدەسۋ – ۋكراينا سوعىسىنىڭ تاعدىرىن ايقىندايتىن شەشۋشى كەزەڭنىڭ ءبىرى. ترامپتىڭ «قىرىمنان باس تارتۋ» جانە «ناتو-دان الىستاۋ» ءتارىزدى تالاپتارى كيەۆ ءۇشىن اۋىر سىناق بولىپ تۇر. ال زەلەنسكي ءوز ەلىنىڭ تاۋەلسىزدىگى مەن قاۋىپسىزدىگىن ساقتاۋ جولىندا باتىستىڭ قولداۋىنا ارقا سۇيەۋگە تىرىسادى.
