ۇلتتىق ونەر مەن تاريحتى تەمىرقازىعىنا اينالدىرعان ءمۇسىنشى قوردايدىڭ سۇر گرانيتىنە ابايدىڭ پورترەتىن قاشاپ سالىپ, ونىڭ سىرتىنا كەمەڭگەر تۇلعانىڭ «اقىن, قايرات, جۇرەكتى بىردەي ۇستا» دەگەن ۇلاعاتتى ءسوزىن جازىپ قويعان. مۇنىمەن قوسا, تومەنگى تۇسىنا ارنايى QR كود قويىلعان. وندا حاكىمنىڭ عۇمىربايانى مەن شىعارماشىلىعى جونىندەگى مالىمەتتەر توپتاستىرىلعان.
اقىن كوشەسىندەگى اعايىن شاراپاتتى ءىس-شاراعا قۋانىپ, شاشۋىن شاشىپ, كيىز ءۇيىن تىگىپ, مەيماندارعا اس بەردى. اباي كوشەسىنىڭ تۇرعىندارى بۇل ۇلكەن سىي بولدى دەپ, سۋرەتشى, رۋحانيات جاناشىرى امانتاي مىرزاعا العىسىن جاۋدىردى.
كوشەنىڭ باسىندا ورناتىلعان ەسكەرتكىش تاقتانىڭ سالتاناتتى اشىلۋ راسىمىندە بۇقار جىراۋ اۋداندىق ءماسليحاتىنىڭ توراعاسى اسحات ءالي مەن اۋداندىق ارداگەرلەر كەڭەسىنىڭ توراعاسى توكەن ارباباەۆ قۇتتىقتاۋ ءسوز سويلەدى. اۋىل مولداسى سۇلتانعالي بەكتاس ۇلى اباي رۋحىنا قۇران باعىشتاپ, دۇعا وقىدى.
اۋداندىق ورتالىق كىتاپحانا قىزمەتكەرلەرى كوشە قۋانىشىنا ورتاقتاسىپ, اشىق كورمە وتكىزدى. قوناقتار اباي شىعارماشىلىعىمەن تانىسىپ, ولارعا جادىنامالار تاراتىلدى.
ودان سوڭ حالىق تەاترى ۇلى ابايدىڭ ومىرىنەن شاعىن قويىلىم ۇسىنىپ, اقىننىڭ ولەڭدەرى مەن قارا سوزدەرى وقىلدى, اندەرى شىرقالدى. وسىلايشا, كوشەنىڭ كوشەلى تويى ءسان-سالتاناتىمەن ءوتتى.
امانتاي نۇرتاي ۇلى – بۇقار جىراۋ قالقامان ۇلىنىڭ 350 جىلدىق مەرەيتوي ەمبلەماسىنىڭ اۆتورى. سول كەزدە اۆتور بيكەن ەسىمدى اناسىنىڭ اقىلىمەن جەڭىمپازعا تاعايىندالعان سىياقىنى بابا تويىنىڭ كادەسىنە بەرىپتى. بىلتىر شەشەن جانە ينگۋش ۇلتىنىڭ ساياسي قۋعىن-سۇرگىن قۇرباندارىنا 80 جىل تولۋىنا وراي, ءوز اۋلەتى اتىنان ۇلكەن قورىمعا ەكى مەترلىك گرانيت تاستان بەلگى ورناتىپ, ىنتىماقتاستىق تۋىن كوتەردى.
اتىمتاي ازامات قازىر «رۋحانيات» قوسىمشا ءبىلىم بەرۋ ورتالىعىندا بەينەلەۋ ونەرى ءبولىمىنىڭ ۇستازى. شاكىرتتەرى حالىقارالىق, رەسپۋبليكالىق سايىستاردىڭ جەڭىمپازى رەتىندە تانىلىپ ءجۇر. وسىنداي ەڭبەكتەرى ەسكەرىلىپ, مەملەكەت جانە قوعام قايراتكەرى جۇمابەك تاشەنوۆ اتىنداعى «جىلدىڭ ۇزدىك قايراتكەرى» سىيلىعى تابىستالعان. مۇراتى بيىك ەردىڭ مەرەيى اسسىن دەيمىز.
قاراعاندى وبلىسى,
بۇقار جىراۋ اۋدانى,
بوتاقارا كەنتى
