الدىمەن قازاق كۇرەسى تۋرالى ءبىر اۋىز ءسوز ايتا كەتەلىك. كۇرەس تاريحى تەرەڭدە جاتىر. التايدان اتىراۋعا دەيىنگى يەن دالانى جايلاپ, اتتىڭ جالىندا, تۇيەنىڭ قومىندا كۇن كەشكەن اتا-بابامىز باس قوسقان اس-تويلاردى كۇرەسسىز وتكىزگەن ەمەس. قارسىلاسىنان كۇشى باسىم ءتۇسىپ, جەڭىسكە جەتكەن بالۋانداردى ەجەلدەن ەرلىك پەن ورلىكتى قۇرمەت تۇتاتىن حالىق توبەسىنە كوتەرەر ەدى. قازاقتىڭ حاس باتىرى قاجىمۇقان اتامىزدىڭ ەسىمى ءتول تاريحىمىزعا عانا ەنىپ قويعان جوق, سونىمەن بىرگە سپورتشىلاردىڭ الەمدىك ەليتاسىنىڭ قاتارىنا قوسىلدى. قازاق كۇرەسى بويىنشا ەڭ ءىرى جارىس 1938 جىلى سپارتاكيدادا وتكىزىلگەن ەكەن. سول كۇننەن باستاپ تۇراقتى ۇيىمداستىرىلۋدا.
ءبىزدىڭ كەيىپكەرىمىز اسەت بالالىقتىڭ اسەرىمەن وزگە دە سپورت تۇرلەرىمەن اينالىستى. بىراق, نەگىزگى باعىت قازاقشا كۇرەسكە كەرى اسەرى تيگەن جوق, قايتا شاربولاتتاي شىڭدالا ءتۇستى. 2023 جىلى جالعىزقۇدىق اۋىلىندا وتكىزىلگەن وبلىستىق تۋرنيردە ەكى كۇمىس جۇلدەگە يە بولدى. وسىلايشا بالا بالۋاننىڭ الدىنان داڭعىل جول اشىلا باستادى. استانا جانە تاراز قالاسىندا وتكەن قازاقستان رەسپۋبليكاسى چەمپيوناتىنا قاتىستى وبلىستىق, اۋداندىق جارىستاردا جۇلدەسىز قالعان ەمەس.
2024 جىلى اسەت قىرعىزستاندا وتكەن الەم چەمپيوناتىندا كۇمىس جانە قولا جۇلدەگە يە بولدى. 2025 جىلى وزبەكستاندا جۇلدىزداي جارقىراپ كورىندى, الەم چەمپيونى اتاندى.
اسەت بالۋان عانا ەمەس ساباعىن دا جاقسى وقيدى. ءپان وليمپيادالارىنا ۇزبەي قاتىسادى. قاسىنداعى جورا-جولداستارىنا قول ۇشىن بەرىپ, كومەك كورسەتەدى. نەگىزىندە شىن مىقتى مەيلىنشە قاراپايىم ءارى ادامگەرشىلىك قاسيەتتەرگە يە بولۋى كەرەك.
–مەنىڭ بوز كىلەمدەگى تابىسىما جاتتىقتىرۋشىم حاليبەك سالتاناتتىڭ قوسقان ۇلەسى كوپ, – دەيدى اسەتتىڭ ءوزى.
بوز بالانىڭ تابىسىنا جەرلەستەرى ۇنەمى قۋانىپ وتىرادى. اۋىلداستارىنىڭ اتى وزعانى ولارعا دا مەرەي.
اقمولا وبلىسى
