FIRST LEGO League Asia Open Championship اتتى بۇل بايقاۋ روبوتوتەحنيكا, عىلىمي زەرتتەۋلەر مەن يننوۆاتسيالىق جوبالار سالاسىنداعى ازياداعى ەڭ ءىرى الاڭعا اينالدى. الەمنىڭ 30-دان استام ەلىنەن كەلگەن 500-دەن استام كوماندا مەن 12 مىڭنان استام قاتىسۋشى جينالدى. بيىلعى جارىستىڭ تاقىرىبى «سۋ استى الەمىن زەرتتەۋ».
ۇلتتىق قۇراماعا شىمكەنت, الماتى قالالارىنان, سونداي-اق تۇركىستان جانە قىزىلوردا وبلىستارىنان وقۋشىلار ەندى. بارلىعى دا ەل ىشىندەگى ىرىكتەۋ كەزەڭدەرىنەن سۇرىنبەي ءوتىپ, ينجەنەرلىك, باعدارلامالاۋ بويىنشا جوعارى دايىندىقتارىن دالەلدەدى.
ناتيجەسىندە Leas وقۋ ورتالىعىنىڭ تاربيەلەنۋشىلەرى (6–10 جاس) جانە ورال قالاسىنىڭ وقۋشىلار سارايىنىڭ «Subsquad» كومانداسى (10–16 جاس) قولا مەدالگە يە بولدى. مۇنان كەيىن جەتى مەكتەپ ۇزدىكتەرى تورەشىلەردىڭ ارناۋلى جۇلدەسىمەن ماراپاتتالدى.
«بۇگىندە ەلىمىزدە 300 مىڭنان استام وقۋشىعا ارنالعان جاڭا فورماتتاعى 128 مەكتەپ سالىندى. «كەلەشەك مەكتەپتەرىنىڭ» زاماناۋي STEM-زەرتحانالارمەن جابدىقتالۋى – ءار وڭىردەگى وقۋشىلاردىڭ ينجەنەرلىك ءارى عىلىمي الەۋەتىن دامىتۋعا جول اشتى. ناتيجەسىندە, ولار حالىقارالىق دەڭگەيدە باسەكەگە قابىلەتتى ماماندار رەتىندە قالىپتاسىپ كەلەدى», دەيدى وقۋ-اعارتۋ مينيسترلىگىنىڭ رەسمي وكىلى مەرەكە امانگەلدىقىزى.
