كوللەدج اۋلاسىنا ەنگەن بەتتە-اق جايقالعان جاسىل جەلەككە كوز ءسۇيسىنىپ, كوڭىل مەيىرلەندى. جول جيەگىندەگى اسەم گۇلدەر, اناۋ ءبىر جەردەگى جىلىجاي, عيمارات جانىنداعى ءبىتىمى بولەك اعاشتار, راسىمەن, جانىڭدى شۋاققا بولەيدى. فلوريستيكا ماماندىعىن وقىتاتىن استاناداعى جالعىز كوللەدجدىڭ كەرەمەتىن وسىلاي اۋلاسىنان-اق اڭعاردىق. ءدال قازىر وقۋعا قۇجات تاپسىرۋ ۋاقىتى ءجۇرىپ جاتقاندىقتان, قابىلداۋ قوميسسيانىڭ جاۋاپتى حاتشىسى كاميلا اناپياقىزىمەن جولىعىپ, ستۋدەنتتەردىڭ وسى فلوريستيكا ماماندىعىنا دەگەن قىزىعۋشىلىعىن بىلگىمىز كەلدى.
«فلوريستيكا» ماماندىعى بويىنشا العاشقى ستۋدەنتتەر 2024 جىلى قابىلدانىپ, بۇگىندە 10 ستۋدەنت ءبىلىم الىپ جاتىر. جاڭا وقۋ جىلىنا 25 ستۋدەنت قابىلداۋ جوسپارلانىپ وتىر. ونىڭ ىشىندە 10 ستۋدەنت ەرەكشە ءبىلىم بەرۋدى قاجەت ەتەدى. بولاشاق فلوريستەر 2 جىل 10 اي بويى كوللەدج بازاسىنداعى زەرتحانالاردا جانە ءبىزدىڭ الەۋمەتتىك سەرىكتەستەر قولداۋىمەن تاجىريبەدەن وتەدى. بۇل ماماندىقتى تاڭداعان تالاپكەرلەردىڭ بيولوگيا, ماتەماتيكا جانە وقىتۋ تىلىنە بايلانىستى قازاق جانە ورىس ءتىلىنىڭ ورتاشا باعاسى ەسەپتەلەدى. سونىمەن قاتار سۇحباتتاسۋ جۇرگىزىلەدى. ءبىز 9-سىنىپتى بىتىرگەن تالاپكەرلەردى قابىلدايمىز, ولار وقۋعا تۇسكەن جاعدايدا مەملەكەتتىك گرانت ەسەبىنەن ءبىلىم الادى. وقۋ ورداسىندا وسىعان ۇقساس لاندشافتىق ديزاين, ورمان شارۋاشىلىعى ماماندىقتارى دا وقىتىلادى. جالپى, بۇگىندە بۇل ماماندىقتار بويىنشا 60 ستۋدەنت ءبىلىم الىپ جاتىر», دەيدى كاميلا اناپياقىزى.
ءيا, كوپشىلىك فلوريست دەسە تەك گۇل شوقتارىن قيىپ-كەسىپ, ادەمى بۋكەت جاسايتىن ماماندى ەلەستەتەدى. شىن مانىندە, بۇل ماماندىق تەك گۇلدەرمەن جۇمىس ىستەۋدى عانا ەمەس, سونىمەن قاتار شىعارماشىلىق, ەستەتيكا جانە سەرۆيس سالاسىنداعى ءبىلىم مەن داعدىنى قاجەت ەتەدى. نازىك گۇلدەردىڭ كۇتىمىنە ۇلكەن ىقتياتتىلىق كەرەك. كوللەدج ديرەكتورىنىڭ مىندەتىن اتقارۋشى گاۋھار رامازانوۆانىڭ ايتۋىنشا, وسى وقۋ ورنىندا فلوريستيكا ماماندىعىنا ۇيرەتەتىن ارنايى بىلىكتى وقىتۋشىلار بار.
«جاس ماماندارعا نيدەرلاندتىق «Flower Circus» كومپانياسى شەبەرلىك ساباعىن وتكىزىپ تۇرادى. وقىتۋشىلارىمىز رەسەيدىڭ تاتارستان ايماعىندا «فلوريستيكا» ماماندىعى بويىنشا حالىقارالىق تاعىلىمدامادان وتكەن. ودان بولەك, كوللەدج «Romantic» گۇلدەر ورتالىعى, «قازفلور» گۇل دۇكەنىمەن جانە ورمان شارۋاشىلىعى ماماندىعى بويىنشا «استانا-زەلەنستروي», «جاسىل ايماق» سياقتى كومپانيالارمەن تىعىز جۇمىس ىستەيدى. وسى بايلانىستىڭ ناتيجەسىن ستۋدەنتتەرىمىز قازىردىڭ وزىندە كورسەتىپ, دالەلدەپ جاتىر. ماسەلەن, بيىل كوللەدج تۇلەگى ەرجان بالتاباي رەسپۋبليكالىق «EuroSkills Herning» 2025» بايقاۋىنىڭ ىرىكتەۋ كەزەڭىندە جەڭىسكە جەتىپ, نيدەرلاندتاعى كونكۋرسقا جولداما ۇتىپ الدى. ودان بولەك, بيىل استانادا وتكەن «جۇمىسشى ماماندىقتارى» فەستيۆالىندە ستۋدەنتتەرىمىز لاندشافتىق جوبالاردى تانىستىرىپ, ەستەتيكالىق ەلەمەنتتەردى ورنالاستىرۋ بويىنشا شەبەرلىك ساعاتتارىن وتكىزدى», دەيدى گاۋھار رامازانوۆا.
كوللەدجدىڭ «فلوريستيكا», «لاندشافت ديزاينى», «ورانجەريا», «گيدروپونيكا» زەرتحانالارىن ارالاۋ بارىسىندا ءتۇرلى جايتقا قانىق بولدىق. ستۋدەنتتەر «سارىگۇل», «ارىستان اۋىز گ ۇلى», «قىزىلگۇل», «ايەل باقىتى» سياقتى ءتۇر-ءتۇرلى گۇلدى وزدەرى ەگىپ, وسىرگەن ەكەن. ءتىپتى وسىلاردىڭ كەيبىرىن بۋدانداستىرىپ, جاڭا سورتتار شىعارىپتى. قۋراعان گۇلدەردىڭ دە كۇلتەسىن تاستاماي, ولاردى كەپتىرىپ, ءتۇرلى بۇيىم جاساپ, قالدىققا ەكىنشى ءومىر سىيلاعاندارىنا دا كوز جەتكىزىپ, تاڭداي قاقتىق.
ورمان شارۋاشىلىعى ماماندىعىنىڭ ءبولىم مەڭگەرۋشىسى الۋا تەمىربەكوۆانىڭ ايتۋىنشا, كوللەدج اۋماعىندا جىلىجاي ورنالاسقان. وندا ورمان شارۋاشىلىعى بويىنشا ءبىلىم الاتىن ستۋدەنتتەر كوكونىستەر مەن جيدەكتەردى كۇتىپ باپتايدى.
«جىلىجايىمىزدا ءتۇرلى جەمىستەر مەن كوكونىستەر وسىرىلەدى. ولاردى ستۋدەنتتەر وقىتۋشىلارىمەن بىرىگىپ, كۇتىپ-باپتايدى. «باقشادان – داستارقانعا» جوباسى اياسىندا قازىر قىزىلوردا وڭىرىندە كەڭىنەن تارالعان «امىرە» قاۋىنى ءوسىرىلىپ جاتىر. ونىڭ سالماعى 15 كيلوعا دەيىن جەتەدى. ايتا كەتەيىك, رەسپۋبليكا بويىنشا لاندشافتىق ديزاين, ورمان شارۋاشىلىعى, فلوريستيكا ماماندىقتارىنىڭ «WorldSkills» جارىستارى وسى كوللەدجدىڭ بازاسىندا ۇيىمداستىرىلادى», دەدى الۋا تەمىربەكوۆا.
شىنى كەرەك, قوعامدا فلوريستيكا تەك ايەلدەر اينالىساتىن ماماندىق دەگەن قاتە تۇسىنىك بار. ال شىن مانىندە ناعىز ناۋبايشىلار مەن مىقتى اسپازدار, كرەاتيۆتى ديزاينەرلەر ەرلەردەن شىعاتىنى سەكىلدى, فانتازياسى بولەك فلوريستتەردىڭ دە قاتارىن ەر ازاماتتار تولتىراتىنى بەلگىلى. وعان وسى وقۋ ورنىنىڭ بيىلعى تۇلەگى ەرجان بالتاباي انىق مىسال بولا الادى. ول قازىر شەتەلدە وتەتىن سايىسقا قىزۋ دايىندىق ۇستىندە.
«فلوريستيكا – بۇل تەك گۇلدەرمەن جۇمىس ەمەس, بۇل – اينالاعا ەموتسيا سىيلاپ, سۇلۋلىقتى جەتكىزۋ ونەرى. ءيا, مەن بۇل ماماندىقتى جۇمىس دەپ ەمەس, ونەر دەپ تۇسىنەمىن. وسى سالانى تاڭداعان سەبەبىم دە سول, تابيعات تاماشالارىن ۇيلەستىرە وتىرىپ, ادامدارعا قۋانىش سىيلاعىم كەلەدى. ءدال قازىر نيدەرلاندتا وتەتىن «EuroSkills» جارىسىنا دايىندىق وتە قارقىندى ءجۇرىپ جاتىر. كۇن سايىن فلوريستيكا بويىنشا ءتۇرلى تەحنيكانى قايتالاپ, كۇردەلى كومپوزيتسيالار جاساۋمەن اينالىسامىن. اسىرەسە شىعارماشىلىق ويلاۋ قابىلەتىمدى شىڭداپ جاتىرمىن. ويتكەنى فلوريستيكا شەبەرلىكتى عانا ەمەس, سونىمەن قاتار جاۋاپكەرشىلىك پەن ۇلكەن ىجداعاتتىلىقتى, بايقامپازدىقتى تالاپ ەتەدى», دەيدى ە.بالتاباي.
راسىمەن, فلوريست مامانى – ومىرلىك ماڭىزى بار كاسىپ يەسى. بۇل كوللەدجدەن تەك گۇلدەردىڭ حوش ءيىسى عانا ەمەس, ەڭبەكتىڭ, ىزدەنىستىڭ, شىعارماشىلىقتىڭ ءيىسى سەزىلەدى. وسىنداي زاماناۋي ءبىلىم مەن پراكتيكانى ۇشتاستىرعان وقۋ ورنى ەرتەڭگى كۇنى ەلدىڭ ءسانىن كىرگىزەتىن فلوريست ماماندارىن تاربيەلەپ وتىر. ولار قازىردىڭ وندىرىستە, حالىقارالىق دەڭگەيدە ءوز ورىندارىن تاۋىپ, كاسىپتەرىن دوڭگەلەتىپ ءجۇر.
