فوتو: zharar.com/kz
قۇرىلىس سالاسى جوعارى ءوسۋ قارقىنىن ساقتاپ, ەلىمىزدەگى ءجىو-ءنىڭ 6%-ىن قۇراپ وتىر. تۇرعىن ءۇي قۇرىلىسى نەگىزگى باعىتتاردىڭ ءبىرى بولىپ قالا بەرمەك. ونەركاسىپ جانە قۇرىلىس مينيسترلىگىنىڭ مالىمەتىنشە, 2019 جىلدان باستاپ 2024 جىلعا دەيىن ەلىمىزدە جالپى كولەمى 97,9 ملن شارشى مەتر تۇرعىن ءۇي پايدالانۋعا بەرىلگەن. ونىڭ 39,3 ملن شارشى مەترى جەكە تۇرعىن ءۇي قۇرىلىسىنا, 58,6 ملن شارشى مەترى كوپپاتەرلى تۇرعىن ءۇي كەشەندەرىنە تيەسىلى.
ۇكىمەتتىڭ ءباسپاسوز قىزمەتىنىڭ مالىمدەۋىنشە 2024 جىلدىڭ قورىتىندىسى بويىنشا رەكوردتىق 19,1 ملن شارشى مەتر تۇرعىن ءۇي پايدالانۋعا بەرىلدى (173,9 مىڭ نىسان, ونىڭ ىشىندە 38,9 مىڭى جەكە تۇرعىن ءۇي). قۇرىلىس-مونتاجداۋ جۇمىستارىنىڭ ناقتى كولەم يندەكسى 9 ترلن تەڭگەنى قۇرادى (115,3 %). سالادا 53 مىڭنان استام كاسىپورىن جۇمىس ىستەيدى, ونىڭ 2,9 مىڭنان استامى – قۇرىلىس ماتەريالدارىن وندىرۋشىلەر.
2025 جىلدىڭ ءبىرىنشى جارتىجىلدىعىندا قۇرىلىس جۇمىستارىنىڭ كولەمى 3,31 ترلن تەڭگەگە جەتتى ( بىلتىرعىمەن سالىستىرعاندا +18,4%). 11 ملن شارشى مەتردەن استام جاڭا نىساندار پايدالانۋعا بەرىلدى, ونىڭ 7,9 ملن شارشى مەترى تۇرعىن ۇيلەر. سونىمەن قاتار 111 مەكتەپ, 17 بالاباقشا جانە 31 دەنساۋلىق ساقتاۋ نىسانى سالىندى.
2025 جىلى 19,2 ملن شارشى مەتر تۇرعىن ءۇي سالۋ جوسپارلانىپ وتىر. التى جىل ىشىندە تۇرعىن ءۇي قۇرىلىسىنا 15,4 ترلن تەڭگە ينۆەستيتسيا تارتىلدى, ونىڭ 1,5 ترلن تەڭگەسى بيىلعى جىلدىڭ العاشقى التى ايىندا سالىندى.
