سۋرەت: ttclub.arsenal.kz
زاماناۋي تالاپقا ساي جابدىقتالعان سپورت كلۋبىنىڭ نەگىزىن قالاۋشى –جۋرناليست ايبەك قوسان. ونىڭ ايتۋىنشا, جوبا ەڭ الدىمەن جەكە قىزىعۋشىلىق پەن سالاماتتى ءومىر سالتىن قالىپتاستىرۋعا دەگەن ۇمتىلىستان باستاۋ العان.
– ۇستەل تەننيسىنەن ۇيىرمە اشۋدى بىردەن بيزنەس رەتىندە قاراستىرعان جوقپىن. كەرىسىنشە, كۇندەلىكتى اينالىسىپ جۇرگەن پايدالى ءىستى نەگە ءوزىم ۇيىمداستىرىپ, باسقالارمەن بولىسپەسكە دەگەن وي تۋدى. اپتاسىنا ەكى رەت دوستارىممەن فۋتبول نەمەسە تەننيس ويناۋ – ءومىر سالتىمىزعا اينالعان داعدى. كەيىن وسى ءىستى كەڭەيتىپ, جۇرتشىلىققا پايدالى ورتا قالىپتاستىرۋدى ماقسات تۇتتىم, – دەيدى كلۋب يەسى.
جاڭا ورتالىق تەك سپورتپەن شۇعىلداناتىن ورىن عانا ەمەس, سونىمەن قاتار ۇجىمدىق كەزدەسۋلەرگە, بوس ۋاقىتتى ءتيىمدى وتكىزۋگە ارنالعان كەڭىستىككە اينالعان. اسىرەسە اتا-انالار مەن بالالار بىرگە كەلىپ, وتباسىلىق قارىم-قاتىناستى نىعايتاتىن ورتا قالىپتاسىپ وتىر.
ايبەك قوساننىڭ پىكىرىنشە, ۇستەل تەننيسى – تەك دەنە قيمىلىنا عانا ەمەس, ادام دەنساۋلىعىنا, اسىرەسە كوز بۇلشىق ەتتەرىنە, زەيىن مەن جىلدامدىققا وڭ اسەر ەتەتىن ءتيىمدى سپورت ءتۇرى.
– دارىگەرلەر ۇستەل تەننيسىن كوزگە ارنالعان تابيعي جاتتىعۋ دەپ اتايدى. سەبەبى ويىن كەزىندە كوزدىڭ كورۋ قابىلەتى ارتادى, بۇلشىق ەتتەر جاتتىعىپ, دالدىك پەن زەيىن كۇشەيەدى. اسىرەسە كومپيۋتەر الدىندا ۇزاق وتىراتىندار ءۇشىن بۇل – ءارى سەرگىتكىش, ءارى پايدالى ارەكەت, – دەيدى ول.
كلۋب ۇجىمى ەلىمىزدە جاريالانعان «جۇمىسشى ماماندىقتار جىلى» اياسىندا بىرقاتار تۋرنير وتكىزۋدى جوسپارلاپ وتىر. مۇنداي باستامالار ۇجىمدىق ىنتىماقتاستىقتى ارتتىرىپ, ارىپتەستەر اراسىنداعى قارىم-قاتىناستى نىعايتۋعا, سەرىكتەستىك مادەنيەتىن قالىپتاستىرۋعا باعىتتالعان.
– ۇجىمدىق باسقوسۋلار نەگىزىنەن بەيرەسمي, مەيرامحانا فورماتىندا ءوتىپ جاتادى. ەندى وسى ۇردىسكە جاڭاشا كوزقاراس ۇسىنىپ, پايدالى ءارى دەنساۋلىققا ءتيىمدى باسقوسۋ فورماتتارىن ەنگىزگىمىز كەلەدى. قازىر قوعامدا سالاماتتى ءومىر سالتىنا بەتبۇرىس بار. بۇرىن مۇنداي ءومىر سالتىن تەك شەتەلدىك ۇلگى رەتىندە كورەتىنبىز. ەندى وتباسىلار بالالارىن ءتۇرلى سپورت ۇيىرمەلەرىنە – ءجۇزۋ, فۋتبول, ۆولەيبول, تەننيس سەكىلدى سەكتسيالارعا بەلسەندى تۇردە بەرە باستادى. بۇل – قۋانارلىق ءۇردىس, – دەيدى ا.قوسان.
ونىڭ ايتۋىنشا, بۇگىندە جاستار اراسىندا ۇستەل تەننيسىنە دەگەن قىزىعۋشىلىق ارتىپ كەلەدى. بۇل سپورت تۇرىمەن اۋەسقويلىق دەڭگەيدە دە, جۇيەلى تۇردە دە اينالىساتىندار كوبەيۋدە.
– ۇستەل تەننيسىن بۇقارالىق سپورتقا اينالدىرۋ ءۇشىن ونى مەكتەپ باعدارلاماسىنا ەنگىزسە, ارتىق بولماس ەدى. قوسىمشا ۇيىرمە رەتىندە نەمەسە دەنە شىنىقتىرۋ ءپانىنىڭ ءبىر باعىتى رەتىندە وقۋشىلارعا قولجەتىمدى ەتسەك, دەنى ساۋ ۇرپاق تاربيەلەۋگە قوسىلعان ۇلەس بولار ەدى. سەبەبى بۇل – حالىقارالىق دەڭگەيدە مويىندالعان, كاسىبي سپورت ءتۇرى, – دەيدى كلۋب يەسى.
كاميلا تايتولەۋ,
ل.ن.گۋميلەۆ اتىنداعى ەۇۋ-دىڭ 3-كۋرس ستۋدەنتى
