مەملەكەت باسشىسى قاسىم-جومارت توقاەۆ ءوز جولداۋىندا ەسىرتكىگە قارسى كۇرەستى ۇلتتىڭ گەنوفوندىن ساقتاۋ ماسەلەسى ەكەنىن اتاپ كورسەتكەن ەدى. وسىعان بايلانىستى باس پروكۋراتۋرا مەن ۋاكىلەتتى ورگاندار ەسىرتكى جانە پرەكۋرسورلاردى جەتكىزۋ ارنالارىن, ەسىرتكى زەرتحانالارىن جويۋعا, قىلمىستىق توپتار مەن ەسىرتكى بيزنەسىن ۇيىمداستىرۋشىلاردى انىقتاۋعا, قىلمىستىق كىرىستەر مەن م ۇلىككە تىيىم سالۋعا, سونداي-اق ولارعا كومەكتەسەتىن قۇقىق قورعاۋ ورگاندارىنىڭ قىزمەتكەرلەرىن اشكەرەلەۋگە باعدارلاندى.
باس پروكۋراتۋرانىڭ ءباسپاسوز قىزمەتى ماڭعىستاۋ مەن ۇلىتاۋ وبلىسى, الماتى جانە شىمكەنت قالالارىندا ەسىرتكى دۇكەندەرىن ۇيىمداستىرۋشىلاردى اشكەرەلەگەن ارنايى پروكۋرورلار ساپالى تەرگەۋ امالدارىن جۇرگىزىپ, بۇل باعىتتا بەلسەندى جۇمىس اتقارعانىن جەتكىزدى.
«پروكۋراتۋرا ورگاندارىنىڭ ۇيلەستىرۋىمەن بيىل قۇقىق قورعاۋ جانە ارنايى ورگاندار ەسىرتكى جانە پسيحوتروپتىق زاتتاردى جەتكىزۋدىڭ 111 ارناسىنىڭ جولىن كەستى. زاڭسىز اينالىمنان 9 توننا ەسىرتكى (ونىڭ ىشىندە 254 كيلو سينتەتيكالىق ەسىرتكى) جانە 12 توننا پرەكۋرسورلار تاركىلەندى. ەسىرتكى جانە پرەكۋرسورلار كونترابانداسىنىڭ فاكتىلەرى 182-دەن 80-گە دەيىن تومەندەدى. ياعني 56%-عا ازايدى», دەلىنگەن حابارلامادا.
بۇعان قوسا باس پروكۋراتۋرا قۇقىق قورعاۋ ورگاندارىمەن بىرگە ەكىنشى دەڭگەيدەگى بانكتەردىڭ جۇمىسىنا ينتەرنەت كەڭىستىگىندەگى ەسىرتكى دۇكەندەرىنە بايلانىستى بانكتىك شوتتاردى انىقتاۋ, بۇعاتتاۋ جانە تاركىلەۋ الگوريتمىن ەنگىزگەن. بارلىق ءىس بويىنشا قارجىلىق تەرگەۋ جۇرگىزۋ, سونىڭ ىشىندە قىلمىستىق اقشانى, ەسىرتكى بيزنەسىنىڭ تۇپكىلىكتى بەنەفيتسيارلارى مەن ۇيىمداستىرۋشىلارىن, سونداي-اق «dropper» اۋدارىمدارى جانە باسقا دا زاڭسىز وپەراتسيالار ءۇشىن بانكتىك شوتتارىن ۇسىناتىن ازاماتتاردى انىقتاۋ تۋرالى نۇسقاۋ بەرىلىپتى.
سونىمەن قاتار قۇقىق قورعاۋ جانە مەملەكەتتىك ورگاندار «كيبەرنادزور» اقپاراتتىق جۇيەسى ارقىلى ەسىرتكى دۇكەندەرىن بۇعاتتاۋ جۇمىستارىن جۇرگىزىپ جاتىر. ونىڭ كومەگىمەن بۇگىندە ەسىرتكى ساۋدالايتىن 6 مىڭنان اسا سايت بۇعاتتالعان.
