سۋرەتتى تۇسىرگەن – ەرلان ومار, «EQ»
ءبىلىم – بارشاعا ورتاق قۇندىلىق بولعاندىقتان, ءاربىر بالا قايدا تۇرسا دا, ساپالى ءبىلىم الۋعا تەڭ قۇقىلى. ەگەر اۋىل وقۋشىلارى زاماناۋي بىلىمگە قول جەتكىزە الماسا, بۇل – ۇلتتىق الەۋەتتىڭ تولىق پايدالانىلماي جاتقانىن بىلدىرەدى. اۋىل بالاسىن زامان تالابىنا ساي جايلى ءبىلىم بەرۋ ورتاسىمەن قامتاماسىز ەتۋ ماقساتىندا جۇزەگە اسىپ جاتقان بۇل باستاما ونىڭ قارىم-قابىلەتىنە قاراماستان, كەز كەلگەن بالاعا جايلى ورتا بولماق. اتاپ ايتساق, ەرەكشە ءبىلىم بەرۋ قاجەتتىلىكتەرى بار جەتكىنشەكتەر ءۇشىن دە جەكە سانيتارلىق بولمەلەر, جەدەلساتى, پاندۋستار, ارنايى بەلگىلەر, پسيحولوگ, لوگوپەد جانە دەفەكتولوگ كابينەتتەرى قاراستىرىلعان. ال ءپان مۇعالىمدەرى ينتەراكتيۆتى تەحنولوگيالار مەن پاندىك زەرتحانالاردى قولدانا وتىرىپ, ءار وقۋشىنىڭ قىزىعۋشىلىعى مەن قابىلەتىنە قاراي تۇلعالىق دامۋىنا جول اشادى. سونىمەن قاتار «ادال ازامات» تۇجىرىمداماسىنىڭ نەگىزىندە وقۋشىلاردى ەڭبەكقورلىققا, ادامگەرشىلىككە, ادالدىققا باۋليتىن قۇندىلىقتار جۇيەسى دە قالىپتاسپاق.
مەملەكەت تاراپىنان قولعا الىنعان «كەلەشەك مەكتەپتەرى» جوباسى – تەك جاڭا عيماراتتار سالۋ نەمەسە ينفراقۇرىلىمدى جاڭارتۋ عانا ەمەس, سونىمەن قاتار ءبىلىم بەرۋ مازمۇنىن تۇبەگەيلى جاڭعىرتۋعا باعىتتالعان كەشەندى وزگەرىس. مۇنداي مەكتەپتەردە وقۋشىنىڭ ءبىلىم الۋ تراەكتورياسى جەكە قابىلەتى مەن قىزىعۋشىلىعىنا سايكەس قۇرىلادى. بۇل ءتاسىل بالا بويىنداعى جاسىرىن تالانتتاردى اشۋعا, ونى جان-جاقتى دامىتۋعا مۇمكىندىك بەرەدى دەپ ويلايمىز. وسى تۇستا مۇعالىمدەردىڭ كاسىبي بىلىكتىلىگىن ارتتىرۋ, پەداگوگيكالىق كادرلاردىڭ زامان تالابىنا ساي جاڭاشا ويلاۋىنا جول اشۋ – باستى نازاردا. «كەلەشەك مەكتەپتەرى» تەك وقۋشىعا ەمەس, مۇعالىمگە دە جاڭا مۇمكىندىكتەر ۇسىنىپ, ونى ۇزدىكسىز دامۋعا جەتەلەيدى. اۋىل مەن قالا مەكتەپتەرىنە تەڭ مۇمكىندىكتەر سىيلاپ وتىرعان بۇل جوبا – ۇلكەن ءۇمىت پەن سەنىم ۇيالاتىپ وتىرعان باستاما. ياعني اۋىل بالاسى ءۇشىن دە كەڭ جول اشىلىپ, تسيفرلىق بىلىمگە, ساپالى وقۋ رەسۋرستارىنا, ينتەراكتيۆتى تەحنولوگيالارعا قول جەتكىزۋ مۇمكىندىگى ارتادى. سونىمەن قاتار اۋىلدىق مەكتەپتەرگە جوعارى بىلىكتى پەداگوگتەردى تارتۋ, ولاردىڭ الەۋمەتتىك جاعدايىن جاقسارتۋ, ۇزدىكسىز كاسىبي دامۋ كۋرستارىمەن قامتاماسىز ەتۋ ارقىلى وقىتۋ ساپاسىن ارتتىرۋ – بۇل سالاداعى جۇيەلى وزگەرىستەردىڭ ماڭىزدى بولىگى بولماق. ءبىلىم سالاسىنداعى تەڭ مۇمكىندىكتەر – الەۋمەتتىك ادىلەتتىلىكتىڭ كورىنىسى عانا ەمەس, سونىمەن قاتار ۇلتتىق دامۋ مەن وركەندەۋدىڭ بەرىك نەگىزى. قالا مەن اۋىل مەكتەبى اراسىنداعى الشاقتىقتى ازايتۋ ارقىلى ءبىز ناعىز ساپالى, ينكليۋزيۆتى جانە باسەكەگە قابىلەتتى ءبىلىم جۇيەسىن قالىپتاستىرامىز. وسىلايشا, ەلىمىزدىڭ ينتەللەكتۋالدىق الەۋەتىن ارتتىرىپ, جارقىن بولاشاققا جول اشىپ, باسەكەگە قابىلەتتى ۇلت تاربيەلەي الامىز دەگەن سەنىمدەمىز. سەبەبى ءبىلىم جۇيەسىن تۇبەگەيلى جاڭعىرتۋ, قاۋىپسىز ءارى زاماناۋي وقۋ ورتاسىن قالىپتاستىرۋ – سان مىڭداعان بالانىڭ ارمانىنا اپاراتىن جول بولىپ, ولاردىڭ دارىنى مەن قابىلەتىن تولىق ىسكە اسىرۋعا مۇمكىندىك بەرەتىن ناقتى قادام بولماق.
گۇلزادا ماناتاەۆا,
№12 جالپى ءبىلىم بەرەتىن ورتا مەكتەپ ديرەكتورىنىڭ مىندەتىن اتقارۋشى
قاراعاندى وبلىسى,
بالقاش قالاسى
