ءتورتىنشى تامىز كۇنى ۇلىتاۋ اۋدانىنداعى اباي ەسكەرتكىشىنىڭ جانىندا ادەبي-سازدى كەش ءوتتى. وبلىستىڭ بارلىق اۋداندارى مەن قالالارىندا اباي مۇراسىن ۇلىقتاۋعا ارنالعان كەشتەر, كونتسەرتتەر, كورمەلەر, شىعارماشىلىق كەزدەسۋلەر باستالىپ كەتتى.
ۇلىتاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنىڭ ۇيىمداستىرۋىمەن «اباي – ۇلت كەرۋەنى» جوباسى ۇلت ۇياسى ۇلىتاۋ جەرىنەن باستاۋ الدى. وسى «اباي كەرۋەنى» جوباسى اياسىندا وبلىس اۋماعىندا ءتۇرلى ءىس-شارالار ۇيىمداستىرىلدى.
سونىڭ ءبىرى – ۇلىتاۋ وبلىستىق امبەباپ كىتاپحاناسىندا وتكەن «Abai-quiz» زياتكەرلىك ويىنى. جەتى كەزەڭنەن تۇراتىن ويىنعا بەس توپ قاتىستى. ۇلىتاۋ وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ «ويشىل» توبى, قارجى باسقارماسىنىڭ «اعارتۋشى» توبى, دەنە شىنىقتىرۋ جانە سپورت باسقارماسىنىڭ «سازگەر» توبى, وبلىستىق مەملەكەتتىك ءارحيۆىنىڭ «فيلوسوف» توبى, تايجان قالماعامبەتوۆ اتىنداعى فيلارمونيانىڭ «قايراتكەر» توبى سىنعا ءتۇستى.
حاكىم ابايدىڭ ءومىرى مەن شىعارماشىلىعى تۋرالى قويىلعان سۇراقتار اۋىزشا, جازباشا, اۋديو, بەينە, سۋرەت تۇرىندە بەرىلدى. ءتۇرلى سالادا قىزمەت ىستەپ جۇرگەن جاس ماماندار ابايدىڭ شىعارماشىلىعىنا قىزىعۋشىلىق تانىتىپ, قويىلعان سۇراقتارعا جارىسىپ جاۋاپ بەرگەنى جانعا جىلى شۋاق قۇيدى.
ويىن سوڭىندا ەڭ كوپ ۇپاي جيناعان ۇلىتاۋ وبلىسى قارجى باسقارماسىنىڭ «اعارتۋشى» توبى جەڭىمپاز اتانىپ, ارنايى سىيلىق جانە ديپلوممەن ماراپاتتالدى. بارلىق قاتىسقان توپتارعا العىسحاتتار مەن سىيلىقتار تابىستالدى.
ۇلىتاۋ وبلىسى
