27 جاستاعى شىڭعىس ءمۇسسادىلوۆتىڭ ءمايىتى تابىلعانى تۋرالى مارقۇمنىڭ تۋىستارى جەرگىلىكتى باق-قا حابارلادى. قايعىلى وقيعانىڭ ناقتى ءمان-جايى انىقتالىپ جاتىر. بۇل اقپاراتتى قازاقستانداعى گرۋزيا ەلشىلىگى دە راستادى.
دوستارىنىڭ ايتۋىنشا, شىڭعىس سوڭعى رەت 4 تامىزعا قاراعان ءتۇنى ساعات 03:00-04:00 شاماسىندا, ءتبيليسيدىڭ ورتالىعىنداعى «رۋستاۆەلي» مەترو ستانتسياسىنا جاقىن ورنالاسقان «Laila» كلۋبىنىڭ ماڭىندا كورىنگەن.
«سودان كەيىن ول ۇيىنە ورالمادى, جۇمىسقا دا بارمادى, مۇلدەم ەسكەرتپەدى», دەدى ارىپتەستەرى مەن دوستارى.
وسى ساتتەن باستاپ ونىمەن بايلانىس ءۇزىلىپ, تەلەفون قوڭىراۋلارىنا دا, حابارلامالارعا دا جاۋاپ بەرمەگەن.
ىزدەۋ بىرنەشە كۇنگە سوزىلدى. تۋىستارى مەن جاقىندارى تبيليسي پوليتسياسىنا ارىز بەرىپ, الەۋمەتتىك جەلىلەردە ونىڭ ەرەكشە بەلگىلەرىن كورسەتىپ, ىزدەۋ تۋرالى حابارلامالار تاراتتى: كوزىلدىرىك تاققان, بويى 170 سم, دەنە ءبىتىمى ورتاشا, شاشى قارا, ازداپ اعارعان, كوزدەرى جاسىل-قوڭىر. ۇستىندە قىسقا جەڭدى قويۋ جاسىل زىعىر كويلەگى مەن قويۋ سۇر شالبارى بولعان.
قازىرگى تاڭدا شىڭعىس ءمۇسسادىلوۆتىڭ قازا بولۋ سەبەپتەرى رەسمي تۇردە جاريالانعان جوق. گرۋزيا قۇقىق قورعاۋ ورگاندارى ازىرگە ەشقانداي تۇسىنىكتەمە بەرگەن جوق.
گرۋزيا پوليتسياسىنا جولدانعان رەسمي ساۋالعا جاۋاپ رەتىندە, قازاقستاندىق ازاماتتىڭ ولىمىنە قاتىستى اقپارات تەك مارقۇمنىڭ تۋىستارىنىڭ كەلىسىمىمەن عانا بەرىلەتىنى ايتىلدى, سەبەبى بۇل ىستە جەكە مالىمەتتەر قامتىلعان.
