سۋرەت: elordainfo.kz
حالىقارالىق ۇستەل تەننيسى فەدەراتسياسىنىڭ (ITTF) كۇنتىزبەسىندەگى سايىس 2028 جىلى لوس-اندجەلەستە وتەتىن پاراليمپيا ويىندارى مەن الەم چەمپيوناتىنا ءىزاشار تۋرنير بولدى. ەلوردا ءتورىن دۇبىرگە بولەگەن سايىستا ەلىمىزدىڭ پارا تەننيسشىلەرىنەن بولەك, مالايزيا, ءۇندىستان, فرانتسيا, گونكونگ, بەلگيا, جاپونيا, وڭتۇستىك كورەيا, پولشا, گەرمانيا, بولگاريا, ۇلىبريتانيا, تۇركيا سىندى 15 ەلدەن كەلگەن 138 سپورتشى باق سىنادى. ولار جەكە, جۇپتىق سىندا تارتىسقا ءتۇسىپ, جۇلدەلەردى ءبولىستى.
جانكۇيەرلەر ءۇمىتىن ارقالاپ شىققان 39 سپورتشىمىز 15 جۇلدە ولجالادى. 5 كۇنگە ۇلاسقان تۋرنيردە ساڭلاقتارىمىز 1 كۇمىس, 4 قولا, جۇپتىق, ارالاس جۇپتىق سايىستان 2 التىن, 4 كۇمىس, 4 قولا مەدال يەلەندى. قازاق سپورتىنىڭ تاريحىنداعى العاشقى التىن مەدالدى ەرلەردىڭ جۇپتىق باسەكەسىندە پاريج وليمپياداسىنا قاتىسۋشى ءالي ماقۇلبەكوۆ بەيتاراپ سپورتشى تيمۋر حۋسنۋللينمەن (MD14 ساناتى) بىرگە الدى. سونداي-اق XD4 ساناتىندا ارالاس جۇپتىق سايىستا الەنا كۋتاتيۆنا بەيتاراپ سپورتشى دميتري لاۆروۆپەن كۇش بىرىكتىرىپ, حالىقارالىق دودانىڭ چەمپيونى اتاندى.
ءبىر سپورتشى بىرنەشە سايىس تۇرىندە جۇلدەگە تالاسقاندىقتان, بىرنەشە مەدال ولجالاعان وتانداستارىمىز مەرەيىمىزدى تاسىتتى. ەل قۇراماسىنداعى ەڭ قارت ويىنشى 79 جاستاعى گاليا بەسپالايا جەكە سىندا دا, ءارى ارالاس جۇپتىق سايىستا دا كۇمىس مەدالدى يەلەندى. بۇدان بولەك, ءالي ماقۇلبەكوۆ (1 التىن, 1 قولا), التىناي ەرجانقىزى (2 كۇمىس, 1 قولا), مارات سۇرتىباەۆ (1 كۇمىس, 1 قولا) شەبەرلىگىمەن دارالاندى. ارۋجان گينياتوۆا, ەرجان جاقانوۆ, اسحات تاجميەۆ, ايگۇل ناسيحاتوۆا, ماحانبەت ناسيحان, راۋشان ورىنباەۆا, ءمادي وماقوۆ العاش رەت «ITTF World Para Challenger» دوداسىنىڭ مەدالىن ەنشىلەدى.
پاراۇستەل تەننيسىنەن «ITTF World Para Challenger» ءتۋرنيرى بۇرىنىراقتا پولشا, برازيليا, چەرنوگوريا, سلوۆەنيا, قىتاي ەلدەرىندە ءوتتى. حالىقارالىق پاراۇستەل تەننيسى فەدەراتسياسىنىڭ باسشىلىعى ەلوردا تورىندەگى تارتىس جوعارى دەڭگەيدە ۇيىمداستىرىلعانىنا العىسىن ءبىلدىردى. ەندى تۋرنير جىل اياعىنا دەيىن ءباا مەن مىسىردا وتەدى.
