زەڭگىر اسپاننىڭ اڭىز تۇلعاسى

ادامزات بالاسى ميلليونداعان جىل بويى قاناتتى قۇستاي كوككە ۇشىپ, عالام­شاردى قاق جارعان قۇس جولىن ءتىلىپ ءوتىپ, عارىشقا توتە ساپار شەگۋدى قيال­داپ كەلگەنى بەلگىلى. سول ادامزاتتىق اڭسارعا 1961 جىلدىڭ 12 ساۋىرىندە يۋري گاگارين قول جەتكىزىپ, قورقىت قوبىزىنىڭ ءۇنى قال­­عان دالامىزدان ۇلى ساپارعا اتتاندى. جۇمىر جەر بەتىن ءدۇر سىلكىنتكەن سول تاريحي وقيعادان كەيىن قانشاما قارا­­دومالاق ارمانىنا قانات بايلاپ, عارىش­­كەر بولماققا بەل بۋدى. سونىڭ ءبىرى ءارى بىرە­گەيى – تالعات امانگەلدى ۇلى مۇسا­باەۆ ەدى.

الماتى وبلىسى قارعالى اۋىلىندا 1951 جىلدىڭ 7 قاڭتارىندا دۇنيەگە كەلگەن ارمانشىل ۇل 1994 جىلى عارىشقا كوتەرىلدى. ءسويتىپ, قازاق حالقىنان تۇڭعىش عارىش ەسىگىن اشقان داڭقتى اعاسى توقتار اۋباكىروۆتىڭ جولىن جالعاپ, وسى ساپاردا 126 كۇن عارىشتا ايالدادى. تالعات امان­گەلدى ۇلى 1998 جىلى – 208 كۇن, 2001 جىلى 8 كۇن عىلىمي زەرتتەۋ جۇرگىزدى. ادامزات بالا­سىنىڭ عارىشتى يگەرۋىنە ەلەۋلى ۇلەس قوستى.

زەڭگىر اسپان جۇزىندەگى ءار قۇبىلىسقا قۇمارتا قاراعان قازاق بالاسىنىڭ ارزۋ ارمانىن جەتىقاراقشىعا جەتكىزىپ, جۇلدىزدارى جامىراعان عارىشتا تاۋەلسىز ەلدىڭ كوك بايراعىن جەلبىرەتىپ, جۇرتتىڭ تىلەۋىن تەمىرقازىققا ايت­قان اردا ازامات­تىڭ رۋحى ەلى باردا ۇمى­تىل­ماسى انىق. سوندىقتان دا, باتىر تالعاتتىڭ ارتىندا قالعان قالىڭ ەلىنە قايعىرا كوڭىل ايتا­مىز! جاراتقان يە قابىرعامىزدى قايىس­تىر­عان قارالى قازانىڭ قايىرىن بەرگەي!

قوش بولىڭىز, عارىش قاھارمانى!

«قازاق گازەتتەرى»  سەرىكتەستىگىنىڭ ۇجىمى