وڭىرلىك پوليتسيا دەپارتامەنتىنەن حابارلاعانداي, الاياقتار قوعامدىق ومىردەگى ترەندتەر مەن قارجى نارىعىنداعى جاڭالىقتاردى تۇراقتى باقىلاپ, ادىستەرى مەن سحەمالارىن ۇنەمى جەتىلدىرىپ وتىرادى. قاسكۇنەمدەر وزىنە قاجەتتى اقپاراتقا قول جەتكىزسە, بىرنەشە مينۋت ىشىندە شوتىڭىزداعى بار قاراجاتتى قالتاسىنا باسىپ, ميلليونداعان نەسيەنى موينىڭىزعا ءىلىپ كەتە بەرەدى.
مۇنداي الاياقتىق سحەمالارىنىڭ بىرىنە اقسۋ قالاسىنىڭ تۇرعىنى تاپ بولدى. ول قاسكۇنەمدەردىڭ ايلا-شارعىسىنا تۇتىلىپ, 15 ملن 257 مىڭ تەڭگە سوماسىندا نەسيەنى ارقالاپ قالدى.
- ماعان WhatsApp ارقىلى ءوزىم جۇمىس ىستەيتىن زاۋىتتىڭ كاسىپوداق كوميتەتىنىڭ توراعاسىنان حابارلاما كەلدى. بەلگىسىز ادامدار مەنىڭ اتىما نەسيە راسىمدەگەنى تۋرالى جازىپتى. ءبىر مينۋتتان كەيىن ماعان ۇلتتىق بانكتىڭ قىزمەتكەرلەرى قوڭىراۋ شالىپ, اقشانىڭ قاۋىپسىزدىگىن قامتاماسىز ەتۋ ءۇشىن قاراجاتتى شۇعىل تۇردە وزگە شوتتارعا اۋدارۋىم كەرەك دەپ سەندىردى. قورىققانىمنان ولاردىڭ ايتقانىن قالاي جاساعانىمدى سەزبەي دە قالدىم. ەكى بانكتەگى دەپوزيتتەن اقشامدى شەشىپ, سونداي-اق باسقا بانكتەن نەسيە راسىمدەپ, كورسەتىلگەن ءتۇرلى شوتتارعا اۋداردىم,-دەپ ءبولىستى ءوزىنىڭ الدانۋ وقيعاسى تۋرالى جابىرلەنۋشى ايەل.
اقىر-سوڭى ول ءوزىنىڭ الاياقتاردىڭ قۇربانى بولعانىن ءتۇسىنىپ, پوليتسياعا حابارلاسقان.
پوليتسەيلەر ماڭىزدى قارجىلىق شەشىمدەر قابىلداۋعا ەشقاشان اسىقپاۋ كەرەكتىگىن ەسكەرتەدى. بەيتانىس ادامدارعا جەكە دەرەكتەرىڭىزدى, سونىڭ ىشىندە جەكە باستى كۋالاندىراتىن قۇجاتتاردىڭ كوشىرمەلەرىن جىبەرمەڭىز.
پاۆلودار وبلىسى
