قالا تۇرعىنى ليتسەنزياسىز جۇمىس ىستەپ, Binance جانە TotalCoin پلاتفورمالارى ارقىلى تسيفرلىق اكتيۆتەردى ساتىپ الۋمەن جانە ساتۋمەن اينالىسقان. وسىلايشا, ول 1,5 جىل ىشىندە 144 ملن تەڭگەدەن استام تابىس تاپقان.
وسكەمەن قالالىق № 2 سوتىنىڭ مالىمەتىنە سۇيەنسەك, ايىپتالۋشى ەكى كريپتوبيرجانىڭ ءموبيلدى قوسىمشاسىن جۇكتەپ, ۆەريفيكاتسيادان وتكەن. جالعان ەسىمدەرمەن تىركەلىپ, كليەنتتەردەن تاپسىرىس قابىلداي باستاعان. ول وپەراتسيالاردى Bitcoin, USDT, Litecoin سىندى كريپتوۆاليۋتالار ارقىلى جۇرگىزىپ, اقشانى ءوزىنىڭ جانە تانىستارىنىڭ بانكتىك شوتتارىنان شەشىپ وتىردى.
تەرگەۋ بارىسىندا ازاماتتىڭ قازاقستاندا حالىقارالىق «استانا» قارجى ورتالىعىنىڭ شەگىنەن تىس جەرلەردە قامتاماسىز ەتىلمەگەن تسيفرلىق اكتيۆتەرمەن كەز كەلگەن وپەراتسيا جاساۋعا تىيىم سالىنعانىن بىلگەنى انىقتالدى. سوعان قاراماستان ايىپتالۋشى قىزمەتىن توقتاتپاعان جانە ونى زاڭداستىرۋعا ارەكەت جاساماعان.
— سونىمەن قاتار ول بىرنەشە تانىسىنان بانكتە شوت اشۋدى سۇراپ, شىنايى ماقساتىن جاسىرعان. كەيىن بۇل شوتتار ارقىلى كليەنتتەردىڭ قاراجاتتارى اۋدارىلىپ وتىرعان. ال كليەنتتەر وپەراتسيالاردىڭ زاڭسىز ەكەنىنەن مۇلدە بەيحابار بولدى. سوت شەشىمىمەن ايىپتالۋشى 2 جىل 6 اي مەرزىمگە بوستاندىعىن شەكتەلدى, — دەلىنگەن اقپاراتتا.
ايتا كەتەيىك, سوتتالۋشى بۇل شەشىممەن كەلىسپەي, اپەللياتسيالىق شاعىم تۇسىرگەن.
