سۋرەتتە: ۇلىتاۋ اۋدانى ورتالىعىندا سالىنىپ جاتقان تيپتىك اۋرۋحانا.
جاڭاارقاداعى اۋداندىق اۋرۋحانا كوپبەيىندى اۋدانارالىق اۋرۋحانا بولىپ وزگەرىپ, كەڭەيىپ جاتىر. بىلتىر وبلىستىق بيۋدجەتتەن 380 ملن تەڭگە قارجى بولىنگەن. ەمحانا 200 كەلۋشىگە ارنالعان. دارىگەرلەر جەتىسپەيدى. امال جوق, حيرۋرگ, اكۋشەر-گينەكولوگ بولىپ زەينەتكە شىققان ادامدار ىستەيدى. بيىل 1 ملرد تەڭگە قارجى ءبولىنىپتى. بۇل قارجىعا اۋرۋحانا كۇردەلى جوندەۋدەن وتەدى. زاماناۋي اپپاراتپەن جابدىقتالىپ جاتىر. ماسەلەن, كومپيۋتەرلىك توموگرافيا اپپاراتى بار, بىراق ونىمەن جۇمىس ىستەيتىن ارنايى مامان جوق. مامان كەلسە قارجىلاي كومەك, باسپانا بەرۋ كەرەك. بيىل اۋداندا ءبىرىنشى رەت دارىگەرلەرگە ارنالعان 18 پاتەرلى ءۇش قاباتتى ءۇي سالىنعالى وتىر. قارجىسى ءبولىندى. اۋرۋحانانىڭ الدىنان ورىن بەلگىلەندى.
اۋىلدىق جەرگە مامان تارتۋ دا وزەكتى ماسەلە بولىپ تۇر. بوس ورىنداردىڭ جارمەڭكەسىنە بارعان ۋاقىتتا جاس ماماندار «بەرەتىن باسپانا زاماناۋي تالاپقا ساي ما؟» دەگەن ساۋال قويادى.
جىل سايىن اۋدان ورتالىعىندا حالىق سانى كوبەيىپ كەلەدى. وكىنىشكە قاراي, جەرگىلىكتى تۇرعىندار وزدەرى تۇرعان مەكەندەگى تىركەۋدەن شىعىپ, قالاعا تىركەلگەن. جۇكتى ايەلدىڭ كوبى ءوزى تۇرعان اۋدان ورتالىعىنداعى دارىگەردىڭ باقىلاۋىندا بولىپ, ايى-كۇنى تولعاندا قاراعاندى قالاسىنا بارىپ بوسانادى. بۇل ويلانارلىق ماسەلە. شىندىعىنا كەلسەك, وسى اۋدان, اۋىلدا ءتۇتىنىن تۇتەتىپ, سۋىن ءىشىپ وتىر.
«اۋرۋحانانىڭ بەرگەن دەرەگىنە سۇيەنسەك, 2021 جىلدان بەرى سىرقاتپىن دەپ تىركەلگەن 3,5 مىڭ ادام قالاعا بارىپ قايتا تىركەلىپ, ەمدەلۋگە سول جاققا كەتىپ قالعان. بۇل تەك مەديتسينا سالاسىندا ەسەپتە تۇرعاندار. قانشاما ۇلكەن كىسىلەردى بىلەمىن, بالالارىنا قاراعاندى, استانادان ءۇي الىپ, سوعان تىركەپ قويعان. سول جاقتىڭ مەديتسينالىق باقىلاۋىندا. ءتارتىپ بويىنشا تىركەلگەن جەردە تۇرماسا ايىپپۇل سالىنادى. بىراق وعان قاراپ جاتقان ەشكىم جوق», دەيدى جاڭاارقا اۋدانىنىڭ اكىمى قانات قوجىقاەۆ.
2024 جىلى ۇلىتاۋ اۋدانىنىڭ دەنساۋلىق ساقتاۋ سالاسىن دامىتۋعا 347,5 ملن تەڭگە ءبولىنىپ, سونىڭ ەسەبىنەن اۋىلدىق ەمحانالاردىڭ ماتەريالدىق-تەحنيكالىق بازاسىن جاڭارتۋعا مۇمكىندىك جاسالدى. 2023 جىلى ۇلىتاۋ اۋدانى ورتالىعىندا اۋىسىمىندا 100 كەلۋشىگە ارنالعان, 20 ورىندىق تيپتىك ۇلگىدەگى اۋرۋحانا قۇرىلىسى باستالدى. مەردىگەر ۇيىم «NAK Construction», سۋبمەردىگەر «سامعا» جشس قۇرىلىستى 2025 جىلدىڭ سوڭىنا دەيىن اياقتاپ, ىسكە قوسۋدى جوسپارلاپ وتىر.
بۇرىنعى اۋرۋحانا شيرەك عاسىر بۇرىن بالاباقشاعا لايىقتاپ سالىنعان. سانيتارلىق نورماعا سايكەس كەلمەيدى. كابينەت جەتىسپەيدى. جەرگىلىكتى حالىق جاڭا اۋرۋحانانىڭ ىسكە قوسىلعانىن اسىعا كۇتىپ ءجۇر. دەگەنمەن قۇرىلىس جۇمىسى باياۋ ءجۇرىپ جاتقانى بايقالادى. سالىنىپ جاتقان عيماراتتىڭ باسىنا بارىپ, ءمان-جايدى سۇراستىرعاندا پروراب كەنجەباي احمەتوۆ: «مەندە تۇك اقپارات جوق, بۇگىن كەلىپ تۇرعان اداممىن, ءبىر جەتى جۇرسەم ناقتى ايتىپ بەرەر ەدىم», دەپ توتەسىنەن جاۋاپ بەردى. سەبەبىن سۇراعاندا: «ماعان دەيىن ەرلان, ايبات دەگەن ازاماتتار جاۋاپتى بولعان ەكەن, ولاردى تانىمايمىن. قازىر عانا جوبانى قولىما الدىم, ءارى قاراي نە ىستەۋ كەرەكتىگىن قۇرىلىسشىلارعا ءتۇسىندىرىپ جاتىرمىن», دەدى.
سۇراستىرىپ بىلسەك, نىساننىڭ قۇرىلىس جۇمىسى بىرنەشە رەت توقتاپ قالعان. العاشقىدا جوبالىق-سمەتالىق قۇجاتقا تۇزەتۋ ەنگىزىلگەن. كەيىن تاعى ءبىر بلوك قوسۋ ماقساتىندا توقتاعان. ودان كەيىن №3 بلوكتىڭ استىندا جۇمىس جاساۋ كەزىندە جەر استى سۋى انىقتالعان. بۇل ارلەۋ جۇمىستارى, قاسبەت, سىرتقى, ىشكى ينجەنەرلىك جەلىلەر قۇرىلىسىن جۇرگىزۋگە مۇمكىندىك بەرمەيدى. قازىرگى ۋاقىتتا جەرتولە قاباتى اياقتالدى. ۇلىتاۋ وبلىسى قۇرىلىس, ساۋلەت جانە قالا قۇرىلىسى باسقارماسىنىڭ ءبولىم باسشىسى ءالي بەكەنوۆ: «سمەتالىق قۇجاتتامانى وزگەرتپەستەن, جۇمىس جوباسىنا تۇزەتۋ ەنگىزىلەدى. ول جوبا قازىر مەملەكەتتىك ساراپتامادا جاتىر. قورىتىندىسى شىعۋ كەرەك. سوعان قاراماستان قۇرىلىس جۇمىسى جالعاسۋدا. جىل سوڭىنا دەيىن نىساندى قولدانىسقا بەرەمىز. «اۋىل – ەل بەسىگى» باعدارلاماسىمەن جاسالعان جوبانىڭ قۇنى 3 ملرد تەڭگەگە جۋىق. بەس بلوكتان تۇراتىن اۋرۋحاناعا سوڭعى ۇلگىدەگى جابدىقتار قويىلادى. ەمحانا كۇنىنە 100 ادام قابىلداي الادى. جالپى, ۇلىتاۋ وبلىسىندا 14 مەديتسينا مەكەمەسىن قولدانىسقا بەرۋ جوسپارلانعان. ولاردىڭ بارلىعى اۋىلدىق جەردە سالىنىپ جاتىر», دەپ مالىمدەدى.
تيپتىك اۋرۋحانا سالىنىپ بىتكەن سوڭ مەديتسينا ماماندارىنىڭ ماسەلەسى العا شىقپاق. ۇلىتاۋ اۋدانىنىڭ اكىمى امانجول مىرزابەكوۆ: «كەلگەن ماماندارعا ءۇي بەرىپ جاتىرمىز. «ديپلوممەن – اۋىلعا» اتتى باعدارلاما بار. جاس مامانعا ءۇي ساتىپ الۋعا ۇكىمەت كوتەرمە جاردەماقى بەرەدى. كەلگەندەردىڭ كوبىسى ونى العىسى كەلمەيدى. سەبەبى بولىنگەن قاراجاتقا ءۇي ساتىپ السا 10-15 جىل بويى تۇراقتاپ, جۇمىس ىستەۋى كەرەك. ءبىز ۋاقىتشا ءۇي بەرەمىز. ولار بەرگەن ۇيدە ۇزاق تۇرمايدى. ينتەرنەتتەن قالادا قانداي ءۇي, ماماندىق بار – تاۋىپ الادى دا, كەتىپ قالادى. «ديپلوممەن – اۋىلعا» باعدارلاماسى جاستاردى اۋىلعا تارتۋ, بەيىمدەۋ ءۇشىن جاسالعان. دەگەنمەن دەنساۋلىق ساقتاۋ عانا ەمەس, باسقا سالادا تۇراقتاپ قالعاندار سيرەك», دەيدى.
دارىگەرلەرگە مەملەكەت تاراپىنان قولداۋ بار. ۇلىتاۋ وبلىسىنىڭ اكىمى داستان رىسپەكوۆ مەديتسينا قىزمەتكەرلەرىنىڭ كۇنى مەرەكەسىندە سويلەگەن سوزىندە: ««اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 14 نىساننىڭ قۇرىلىسى اياقتالىپ, بيىل تاعى 11 نىسان قولدانىسقا بەرىلەدى. وڭىرىمىزدە جۇمىس ىستەۋگە نيەتتى دارىگەرلەرگە 6-8 ملن تەڭگەگە دەيىن كوتەرمە جاردەماقى تاعايىندالعان. وسى كۇنگە دەيىن مۇنداي قولداۋدى 55 دارىگەر الدى», دەگەن ەدى. سوعان قاراماستان اۋداندىق, اۋىلدىق ەلدى مەكەندەرگە مەديتسينا ماماندارى تۇراقتاماي وتىر.
ۇلىتاۋ وبلىسى
