CLIP بايقاۋى – الەمنىڭ ءتۇرلى ەلدەرىنەن 32 جاسقا دەيىنگى اسا تالانتتى وپەرا انشىلەرى عانا باق سىنايتىن وتە بەدەلدى جارىس. 2015 جىلدان بەرى تۇراقتى ۇيىمداستىرىلىپ كەلەدى.
قازىلار القاسى قۇرامىندا – ميلان قالاسىنداعى La Scala, مونتە-كارلوداعى وپەرا, بۋەنوس-ايرەستەگى كولون تەاترى, مادريدتەگى كورول تەاترى, ۆيسبادەن مەملەكەتتىك تەاترى سىندى تانىمال ونەر وردالارىنىڭ باسشىلارى تورەلىك جاساعان بۇل جولعى ونەر سايىسىنا الەمنىڭ 50-دەن استام مەملەكەتىنەن 200-دەن اسا ءانشى قاتىسقان ەكەن.
وسىلاردىڭ ىشىنەن 92 ۆوكاليست تىكەلەي تىڭداۋعا شاقىرىلىپ, جارتىلاي فينالعا 22 قاتىسۋشى وتكەن كورىنەدى. ال فينالدىق كەزەڭگە تەك 10 ۇزدىك ۆوكاليست جولداما العان. ايگەرىم سول ۇزدىكتەردىڭ اراسىنان سۋىرىلىپ شىعىپ, باس جۇلدەسىن يەلەندى.
ءانشى قىزىمىز ينستاگرام پاراقشاسىنا: «بۇل مەن ءۇشىن ەرەكشە تاجىريبە بولدى. الداعى ۋاقىتتا بۇدان دا ۇلكەن اسۋلاردى باعىندىرام دەگەن سەنىمدەمىن», دەپ جازسا, «اتالعان بايقاۋدىڭ حالىقارالىق وپەرا ونەرىندە ورنى وتە زور ەكەنىن ەسكەرسەك, مۇنداي دەڭگەيدەگى جەڭىس – ۇلكەن جەتىستىك» دەيدى وتاندىق ماماندار.
قازىرگى تاڭدا حالىقارالىق دەڭگەيدە قازاق اتىن شىعارىپ جۇرگەن قارىنداسىمىز 1996 جىلى قايماعى بۇزىلماعان قىزىلوردا وبلىسىنىڭ قارماقشى اۋدانى تۇرماعامبەت اۋىلىندا تۋعان. جاسىنان ءان ونەرىنە ىنتاسى ويانعان ول 2012 جىلى وبلىس ورتالىعىندا ورنالاسقان قازانعاپ اتىنداعى مۋزىكالىق كوللەدجگە وقۋعا ءتۇسىپ, كاسىبي انشىلىك جولىن باستاعان.
كەيىن ەلورداداعى قازاق ۇلتتىق ونەر اكادەمياسىندا ءبىلىمىن جەتىلدىرىپ, تالانتىنىڭ ارقاسىندا الەمدەگى ەڭ بەدەلدى وپەرا مەكتەبى – يتالياداعى «لا سكالا» تەاتر اكادەمياسىندا تاعىلىمدامادان ءوتىپتى.
«وپەرا ءانشىسى ايگەرىم التىنبەك – كوپتەگەن حالىقارالىق ۆوكالدىق بايقاۋدىڭ لاۋرەاتى. ول تانىمال كومپوزيتور دجاكومو ءپۋچچينيدىڭ 100 جىلدىعىنا وراي ۇيىمداستىرىلعان حالىقارالىق وپەرا انشىلەرى بايقاۋىندا جەڭىمپاز اتاندى. سونىمەن قاتار يتاليانىڭ مودەنا قالاسىندا وتكەن نيكولاي گياۋروۆ اتىنداعى وپەرا انشىلەرىنىڭ حالىقارالىق بايقاۋىندا ءۇشىنشى ورىن يەلەندى. قازاق ءانشىسى اتاقتى يتاليالىق وپەرا ءانشىسى ميرەللا فرەنيدىڭ ارنايى سىيلىعىن الدى. الەمنىڭ 470 ءانشىسى قاتىسقان رەناتا تەبالدي اتىنداعى حالىقارالىق ۆوكال كونكۋرسىندا ەكىنشى ورىنعا يە بولدى», دەپ حابارلايدى مادەنيەت جانە اقپارات مينيسترلىگىنىڭ ءباسپاسوز قىزمەتى.
وسى ۋاقىتقا دەيىن رەسپۋبليكالىق جانە حالىقارالىق دەڭگەيدەگى بىرقاتار ۆوكالدىق بايقاۋلاردا الدىڭعى ورىنداردان كورىنىپ, ەلىمىزدىڭ اتىن الەمدىك ساحنادا تانىتىپ كەلە جاتقان ايگەرىم التىنبەكقىزىنىڭ ءاربىر جەتىستىگى – ەلىمىزدىڭ مادەنيەت پەن ونەر سالاسىنداعى بەدەلىن ارتتىرا تۇسەرى ءسوزسىز. تالانتتى ونەر يەسىن وسى جارقىن جەتىستىگىمەن شىن جۇرەكتەن قۇتتىقتاپ, شىعارماشىلىق تابىس پەن تولاعاي جەڭىستەر تىلەيمىز.
