كورسەتىلىم Chaplin كينوتەاترىندا ءوتتى. بۇل فيلم ەلىمىزدە ترانسپلانتولوگيا تاقىرىبىن اشىق تالقىلاۋعا جاسالعان ماڭىزدى قادام. بۇگىندە كۇتۋ پاراعىندا 4 مىڭنان استام ناۋقاس تىركەلگەن. ولاردىڭ 145-ءى – جۇرەك ترانسپلانتاتسياسىنا مۇقتاج. بۇل ادامدار كۇن سايىن «دونور تابىلدى» دەگەن حاباردى كۇتۋمەن ءومىر سۇرەدى. وكىنىشكە قاراي, كەيبىرى سول ءساتتى كۇتپەي-اق ومىردەن وتەدى. جىل سايىن 30-35 پاتسيەنت كۇتۋ پاراعىنان شىعىپ قالادى.
«مەديتسينانىڭ دامۋ دەڭگەيى — قوعامنىڭ دامۋ دەڭگەيىمەن تىكەلەي بايلانىستى. 100-ءشى جۇرەك ترانسپلانتاتسياسىنىڭ جاسالۋى – ءبىزدىڭ قوعامنىڭ جاڭا ءبىر بەلەسكە كوتەرىلگەنىن, دامىعان ەلدەرمەن قاتار كەلە جاتقانىمىزدى كورسەتەدى. وكىنىشكە قاراي, جۇرەك ترانسپلانتاتسياسى تەك قايتىس بولعان دونوردان عانا الىنادى. بۇل – جۇرەك جەتكىلىكسىزدىگىنىڭ سوڭعى ساتىسىنداعى پاتسيەنتتەرگە كومەكتەسەتىن جالعىز جول», دەدى فيلم بارىسىندا UMC باسقارما توراعاسى يۋري پيا.
وپەراتسيا 4 اقپاندا UMC جۇرەك ورتالىعىندا جاسالدى. 10 مينۋتتىق قىسقامەتراجدى فيلمدە دارىگەرلەر سول ءتۇننىڭ قيىن بولعانىن ايتادى. دونور جۇرەك تيەلگەن بريگادا پەتروپاۆلدان استاناعا ۇشىپ شىققانىمەن, اۋا رايىنىڭ قولايسىزدىعىنا بايلانىستى ۇشاق ەلورداعا قونا الماي, باعىتىن قاراعاندىعا بۇرعان. جۇرەك سول جەردەن جەدەل جاردەم كولىگىمەن ەلورداعا جەتكىزىلدى. بۇل ۋاقىتتا وتا جاسايتىن كارديوحيرۋرگتەر كومانداسى ونى كۇتىپ وتىرعان ەدى. مۇنداي ساتتە وپەراتسيا زالىنداعى جاعداي ەرەكشە شيەلەنىسەدى, سەبەبى جۇرەكتى تاسىمالداۋ كەزىندە ۋاقىت – باستى فاكتور. ەگەر ورگان ۋاقىتىندا جەتكىزىلمەسە, ونىڭ فۋنكتسيونالدىق قاسيەتتەرى جوعالۋى مۇمكىن.
ءجۇزىنشى جۇرەكتى الماستىرۋ – ءۇمىتىن ۇزبەي كۇتىپ وتىرعان جۇزدەگەن ناۋقاسقا ءۇمىت سىيلايتىن ماڭىزدى وقيعا بولدى.
ايتا كەتۋ كەرەك, بۇل فيلم UMC جۇرەك ورتالىعى جانە Heart Center Foundation قوعامدىق قورىنىڭ بىرلەسۋىمەن تۇسىرىلگەن. كورسەتىلىم 10 تامىزدا استانادا وتەتىن «جۇرەگىمنىڭ جەڭىمپازى» ءداستۇرلى جۇگىرۋ فەستيۆالىنە ورايلاستىرىلعان. بۇل فەستيۆال – كۇتۋ پاراعىندا تۇرعان ناۋقاستارعا قولداۋ كورسەتۋ ماقساتىندا وتكىزىلەدى.
دەرەكتى ءفيلمدى YouTube پلاتفورماسىنان كورۋگە بولادى.
