12 شىلدەدەن باستاپ كۇشىنە ەنگەن زاڭناما نورماسىنىڭ نەگىزگى ماقساتى – ازاماتتاردىڭ قۇقىقتارى مەن بوستاندىقتارىن, ونىڭ ىشىندە ءدىني سەنىم بوستاندىعىن شەكتەمەي, قوعامدىق قاۋىپسىزدىكتى قامتاماسىز ەتۋ, ادامداردىڭ تۇلعاسىن تانۋ مەن قوعامدىق ءتارتىپتى ساقتاۋ.
پوليتسيا وكىلدەرىنىڭ ايتۋىنشا, بۇل تىيىم ادامنىڭ بەت-ءجۇزىن تولىقتاي جاۋىپ, تۇلعاسىن انىقتاۋعا كەدەرگى كەلتىرەتىن كيىمدەرگە قاتىستى. اتاپ ايتقاندا, بەتتى تۇتاس جاباتىن بەتپەردە, نيكاب سەكىلدى كيىمدەرگە تىيىم سالىنادى.
ال حيدجاب, شەيلا, حيمار, ال-اميرا سياقتى بەت-ءجۇزدى جاپپايتىن كيىم تۇرلەرىنە بۇل نورما قولدانىلمايدى.
سونداي-اق بۇل شەكتەۋ اۋا رايىنىڭ ەرەكشەلىگىنە نەمەسە مەديتسينالىق قاجەتتىلىككە بايلانىستى قولدانىلاتىن كيىمدەرگە قاتىستى ەمەس. سونىمەن قاتار زاڭ تالاپتارىن ورىنداۋ كەزىندە, قىزمەتتىك نەمەسە ەڭبەك مىندەتتەرىن اتقارۋ بارىسىندا, ازاماتتىق قورعاۋ, سپورتتىق, بۇقارالىق-سپورتتىق جانە مادەني ءىس-شارالارعا قاتىسۋ كەزىندە دە بۇل تالاپ قولدانىلمايدى.
ءتۇسىندىرۋ جۇمىستارى بارىسىندا ۋچاسكەلىك پوليتسيا ينسپەكتورلارى ازاماتتارعا وزگە دە قۇقىق بۇزۋشىلىقتار مەن قىلمىستاردىڭ الدىن الۋ شارالارىن ءتۇسىندىردى. اتاپ ايتقاندا, ينتەرنەت-الاياقتاردىڭ الداۋ تاسىلدەرى تۋرالى ايتىپ, تۇرعىنداردىڭ ءجيى الدانۋ سەبەپتەرىن مىسالدارمەن جەتكىزدى.
